Ivalo & Minik Fonden legatinik agguaasseqammerpoq

Kalaallinut pikkorissunut angusaqarusussuseqartunullu pingasunut, tassaasunut Aviâja Egede Lynge, Qupanuk Egede aamma Monika Paulli Andersen, millionit koruunit kuartii sinnilaarlugit aningaasartalinnik tapiiniarluni Aningaasaateqarfik aalajangerpoq.

Aviâja Egede Lyngep ilinniarnini New Yorkimi  USA-miittumi, Columbia Universitytimi, kusanaqisumi, naammassiniassammagu aningaasanik tapiiffigineqarpoq. Aningaasanik tapiiffigineqartut marluk sinneri Australialiassapput, Qupanuk Egedep aatsitassarsiornermut ilinniaqqinnini naammassiniassallugu, Monika Paulli Andersenilu Sydneymi ilinniarnissaminut tapiiffigineqarluni.

AAMMA ATUARUK: Aningaasaateqarfik Ivalo & Minik legatimut qinnuteqartussarsiorpoq

Aningaasaateqarfiup Ivalo aamma Miniup, siunertaraa kalaallinut, nunani allani qaffasissumik ilinniarusuttunut, imaluunniit nunani allani piginnaanngorsaqqikkusuttunut, aningaasanik tunissuteqartarnissaq. Aningaasat tunniunneqartut NunaFondenimit, Royal Greenlandimit, Royal Arctic Linemit aamma GrønlandsBankip Inuussutissarsiornermut Aningaasaateqarfianeersuupput.