Aningaasaateqarfik Ivalo & Minik legatimut qinnuteqartussarsiorpoq
Aningaasaateqarfik Ivalo & Minik kalaallit ilinniarnermut aningaasaateqarfiutigaat, atserneqartoq kunngikkormiut marlulissat atsiullugit; Kunngikkormiutut ataqqinassusilik Prins Vincent Frederik Minik Alexander aamma kunngikkormiutut ataqqinassusilik Prinsesse Josephine Sophia Ivalo Mathilda.
Aningaasaateqarfik pilersinneqarpoq NunaFondenimit 2012-mi, aningaasaateqarfillu maannakkut piareerpoq kalaallinut Kalaallit Nunaata Danmarkillu avataanni ilinniaqqikkusuttunut imaluunniit piginnaanngorsaqqikkusuttunut aningaasaliinissaminut aamma ilinniartunut ilinniarnermut atatillugu sungiusaatigalugu nunani allani sulerusuttunut.
- Qilanaaqaanga qinnuteqaatinik takkuttussanik nalilersuinissannut, Minik Rosing, Aningaasaateqarfik Ivalo & Minik-mi siulersuisunut siulittaasoq oqarpoq nangillunilu:
- Neriuppunga upperalugulu piukkunnartunik tunngavilersorluakkanillu qinnuteqaaterpassuarnik tigusiumaarluta, Minik Rosing oqarpoq.
Aappaagu februaarip 15-iani kingusinnerpaamik qinnuteqartoqassaaq aamma legatit tunniunneqassapput periarfissaqartitsilluni ilinniarneq imaluunniit ilinniarnermut atatillugu sungiusaatigalugu sulineq 2014-mi ukiakkut semesteri aallartippat.
- Pingaaruteqarpoq qinnuteqarnermi tamakkiisumik eqqarsarnissaq. Ilaatigummi naammanneq ajorpoq nunani allani universitetimi atuarnissamut akitsuutip akilernissaannaa qinnutigissagaanni. Aamma angalanermut aningaasartuutit eqqarsaatigisariaqarput, ineqarnermut aningaasartuutit, inuussutissat assigisaallu, taamaattumik pingaaruteqarpoq suut tamaasa eqqarsaatiginissaat, qinnuteqalernermi, Minik Rosing erseqqissaavoq.
Qinnuteqarnermut atatillugu immersugassaq allallu piumasaqaatit Aningaasaateqarfiup Ivalo & Minik-up nittartagaani, www.imf.gl-mi nassaarineqarsinnaapput.
Aningaasaateqarfik Ivalo & Minik manna tikillugu aningaasaliissutinik Royal Arctic Line A/S-mit, Royal Greenland A/S-mit, GrønlandsBankip Inuutissarsiornermut Aningaasaateqarfianit kiisalu NunaFondenimit aningaasaliiffigineqarpoq.
