Ivalo aamma Minik suli eqqoriartuarpaat

Eqqoriaanerillumi arlaqarput, soorlu: Nutaarsiassaqartitsivimmit Ritzauimit allaaserineqarpoq ateq Minik isumaqartoq meeraq ivianngit immuguttoq, aterlu Ivalo isumaqartoq pakkaluaq, najak imaluunniit maliarannguaq - nutaarsiassaqartitsivimmi Ritzauimi tassa taama allaaserinnipput, tusagassiorfinnillu arlalinnit issuarneqarluarpoq. Ateq Ivalo pillugu aviisimi Jyllands-Postenimi aamma eqqoriaasoqarpoq; ujalussiaq, taannalu isumaanut qaninnerulaarpoq.

Oqaasileriffimmit nassuiaatigineqartut naapertorlugit aqqit taakku piniartutut inuussutissarsiornermit pinngortuupput, Minik taaneqaraangat siutip mingua imaluunniit orsoq, iginneq kaavartarluunniit eqqarsaatigineqartarput, Ivalo isumaqarluni ujaloq.

Kunngikkormiuaqqat Minimmik Ivalomillu ilaatigut atserneqarnerat aternik ilisimatuut tupaallaatiginngilaat.

- Tupaallannarpoq, marlulissalli kalaallisut atserneqarnerat aappaatigut ilimanaateqarsimavoq, aternik ilisimatooq Københavnip Universitetianeersoq, Birgit Eggert, nutaarsiassaqartitsivimmut oqarpoq.

Dronning Margrethep aqqisa akornanniippoq islandimiunit aterineqartartoq  Þórhildur, marluliaaqqalli kunngikkormiuni kalaallisut atserneqartuni siullersaapput.

- Kunngissap Kalaallit Nunaannut immikkorluinnaq attaveqarnera nuannarinninneralu peqqutaagunarpoq, Birgit Eggert oqarpoq.

- Tamanna kalaallinut takutikkusuppaa, naggasiivoq.

Julie Berthelsen Ekstra Bladet-mut oqarpoq, kunngikkormiut atertaavi assut tulluusimaarutigalugit, namminermi atiisa Ivalo ilagaat angutaataalu ateqarluni Minik.