Neqit qerisut 5 tonsiusut umiarsuarmut kingullermut ilaallutik Ittoqqortoormiinut tikinngitsoortut
”Qerisorpassuit ukiumut peqqumaatissagut, umiarsuaq kingullermut tikittussaagaluit, ajoraluartumik amerlanerit nassiutinngoorneqarsimapput”.
Ittoqqortoormiini innuttaasut Pilersuisumut pisiniarnerminni allagartaq taama allassimasoq takusinnaavaat.
Sulimulli tassunga atatillugu maanna nutaarsiassaqarpoq.
Pisiortorfimmi kukkusoqarnera pissutigalugu puulukit nersussuillu neqaat qerisut, 5 tonsimik oqimaassuseqartut umiarsuarmut kingullermut ilaallutik Ittoqqortoormiinut tikiunneqartussanut ilaanngitsoorput.
Uivertoqarnissaanulli pissutissaqanngitsoq, Pilersuisup pisiortornermi pisortaa, Brian Chemnitz oqarpoq.
Suli nioqqutissaqartoq
- Ittoqqortoormiini suli nioqqutissaqarpoq. Maani eqqartorneqartussat tassaapput ukiuunerani pilersuissutissat aasaqqinnissaanut pigisassagut. Pisiniarfimmi nioqqutissaqarpoq, amigaateqartoqavinngilaq. Nioqqutissat maanna pigisagut qaammatinut marlunnut pingasunulluunniit naammattussaassapput, Brian Chemnitz oqarpoq.
Nersussuit puulukilluunniit neqaat arfinernut nerisassani qaammatini tulliuttuni amigaatigineqarnavianngitsut, Brian Chemnitzip oqaatigaa.
- Nioqqutissat Ittoqqortoormiinut timmisartukkut tikisittariaqarpagut. Tamanna aqqutissatuaavoq. Ittoqqortoormiit pilersuiniarnermi inissisimanerlulaarpoq, taamaammat nioqqutissanik pingasoriarluni tassa sapaatip akunneranni 45-imit 47-mut tikisitsisoqartarpoq.
Taamaammat nioqqutissat tamarmik novembarip naanerani tikittussaassapput.
Kukkusoqarnerali qanorpiaq pisimanersoq Pilersuisup suli nassuiaatissarsinngilaa.
- Suliap suliani ajutoortoqarsimasoq suli misissorluaqqissaarneqanngilaq. Taamali pisoqaqqinnginnissaa pissutigalugu soorunami ilungersuutigalugu paasiniassavarput. Pisumut atatillugu sooq qanorlu aaqqiissuteqassanerluta suliaqarpugut, Brian Chemnitz oqarpoq.
