Ittoqqortoormiini oqaluffik ueriartortoq

- Oqaluffik isiinnaavillugu malunnarami avammut ueriartuaartoq, tassa nuna qeriuaannartoq aakkiartulerami, biskoppi Sofie Petersen taama oqarpoq. 

Oqaluffiulli aserfallakkiartorneranik maluginiartuni taanna kisiartaanngilaq. Kommunep nakkutilliinermi oqartussaasuusutut oqaluffiik naalagianut navianartorsiortitsimmat Namminersorlutik Oqartussanut iluarsaateqqusimavaa.

Biskoppip aamma nammineerluni oqaluffiup ajoqutai uppernarsarsimavai.

- Assiliortorpara filmiliaralugulu. Kuuleerannguaq tigoriarlugu natermut iligakku ammut ingerlaalerpoq. Malunnarluni ueriartornera, Sofie Petersen taama oqarpoq.

Innuttaasunit erligineqartoq

Oqaluffik 1929-mi sanaajusoq innuttaasunit erligineqaqaaq. Ittoqqortoormiini najukkami ataatsimiititaliap Naalakkersuisut iliuuseqarnissaat kissaatigaat.

- Oqaluffeqarani tujorminassaqaaq aamma oqaluffipput erligaarput. Neriukkaluarpugut arlaatigut iliuuseqartoqassasoq aningaasaliiffigineqarluni taava iluarsineqarluni, Emilie Pike Nielsen, ataatsimiititaliami ilaasortaasoq taama oqarpoq.

Biskoppi Sofie Petersen oqaluffiup iliuuseqarfigineqarnissaa pillugu naalakkersuisoqarfimmut ukiut pingasut qaangiummata saaffiginnissimavoq. Sulili akissutissineqarani.

AAMMA ATUARUK Illoqqortoormiuni oqaluffik aserfallassimaqaaq

Oqaluffittut atorsinnaasumik ujaarlertoqassaaq

Illumik pioreersumik utaqqiisaa oqaluffittut atorsinnaasumik ujarlertoqarnissaa Ilageeqarnermut Naalakkersusiup Doris Jakobsenip sulissutigaa.

- Oqaloqatiginninnerit kommunemut aallartinnikuuagut siullermik atorfilittatigoortumik borgmesteri aamma peqataatillugu ataatsimiinnerit ingerlannikuuagut illunik pioreersunik utaqqiisaasumik oqaluffittut atuisinnaanerput anguniarlugu, Naalakkersuisoq oqarpoq.

Doris Jakobsenip aammattaaq oqaatigaa oqaluffitoqqap nutarsarneqarnissaanut aningaasanik suli immikkoortitsisimanani.