Inatsisartut Ilaqutariinnermut Ataatsimiititaliaat Illoqqortoormiunut tikeraaqqammerput, Ataatsimiititaliamullu Siumut sinnerlugu ilaasortap, Ruth Heilmannip, paasivaa, oqaluffik assut aserfallassimasoq.
- Takussutissat ilaatigut makkuupput: igalaat matuneqarsinnaanngitsut, naqqup quppai silissiartortut matut mapperuminaatsut oqaluffiullu tunngavia qulloortoq, Ruth Heilmann Naalakkersuisunut apeqquteqaatimini allappoq.
Naalakkersuisut tamanna qanoq iliuuseqarfiginiarneraat Ruth Heilmannip paaserusuppaa.
Illoqqortoormiuni oqaluffiup taama aserfallatsigisimaneranut pissutaavoq - Ruth Heilmann naapertorlugu - nuna qeriuaannartoq aakkiartormat oqaluffiup tunngavigisaa sisooriartulersimasoq.
Illoqqortoormiuni oqaluffik 1928-mi tunngavilerneqarpoq.