Ittoqqortoormiini 9. klassit illoqarfimminni atuartalissapput

Tamanna pissaaq aasaanerani atuanngiffeqarneq qaangiuppat. Ukiumi atuarfiusumi 2015/16-imi 10. klassemi atuartut Ittoqqortoormiini aamma atuarsinnaalissapput.

Kommuneqarfik Sermersuumi kommunalbestyrelsep kingullermik ataatsimiinnermini  tamanna aalajangiuppaa.

Nutaarsiassaq nuannersoq tamanna Ittoqqortoormiini meeqqat atuarfianni  Ejnar Mikkelsenila Aluarpiani pisortamit Peter Mønsterimit nuannaarutigineqarpoq,

- Tamanna nalissaqanngilaq. Tamanna tassa atuartunut pitsaanerpaavoq, atuarfimmut aamma illoqarfimmut tamarmut, Peter Mønsted oqarpoq.  

Ukiut marluk matuma siornagut Ittoqqortoormiini ilinniartitsisussaaleqisoqarlunilu aqutsinikkut ajornartorsiuteqartoqarpoq. Tamanna atuartut annerit misilitsinnerminni angusaannut assut kingunerluppoq. Tamannalu patsisigalugu  9. aamma 10. klassit Tasiilamut Nuummulluunniit nuutsinneqassasut kommunalbestyrelsemit aalajangiunneqarluni.  

Atuartut angajulliit illoqarfitsik qimallugu atuariartortinneqartarnerat unitsinneqarpoq. Atuarfik nutaanik aqutsisoqalerpoq ilinniartitsisunillu ilinniarsimasunik arlaqartunik  9. aamma 10. klasseni atuartunik atuartitsinnaasunik atorfinititsisoqarluni.

Ittoqqortoormiini atuarfimmi 9. klassemi atuarsinnaanerup periarfissaalernera  atuartunit nuannaarutigineqarpoq. Atuartut  8. klassemi maanna atuartut  Ittoqqortoormiini 9 klassemi aappaagu atuarniarlutik nalunaarsimapput.

Aappaagu atuarneq aallartinneqarpat Illoqqortoormiuni atuartut 10. klassemi atuarsinnaalissapput.