VIDEO Itsarsuarnitsat tammatsaaliorniarlugit misissuisoqalerpoq
Danmarkimi katersugaasivissuaq Nunatta Katersugaasivia taamaammat maanna suleqatigalugu Nuup eqqaani sumiiffinni qulini misissuinialerput, tamaani immikkut eriagisassatut nalilerneqartut qanoq iliornikkut tamaaniittut tammatsaaliorneqarsinnaanersut misissorneqassalluni:
Misissuinerit aappaagu 2016-imi aallartinneqassasut, aviisip ullormut saqqummersartup Politikenip allaaseraa.
Itsarsuarnitsat immikkut eriagissassatut nalilerneqartut nunami qeriuaannartumi ilaatigut nassaassaapput, tamannalu pissutigalugu allanngutsaaliorneqarnikuullutik, nunalli qeriuaannartup aakkiartorneratigut tamakku silap pissusiata allanngoriartorneratigut eqqorneqarsinnaalissapput.
Attakut taakkununnga ilaapput. Tamakku ilisimatuunit misissuiffissaqqissutut isigineqarput, inuup sananeqaataanut ilisarnaatitut takussutissat, tassa DNA-t ilisimatuunit misissuiffineqarsinnaammata.
Nunatta Danmarkillu katersugaasivii immikkut ilisimasallit Center for Permafrostimeersut, Københavnimeersut, suleqatigalugit misissuissapput. Itsarnitsat nunap qeriuaannartup aakkiartorneratigut annaaneqarsinnaasut qanoq iliornikkut tammatsaaliorneqarsinnaanersut misissuiffigissavaat. Jørgen Hollesen, Danmarkip katersugaasivissuaneersoq taama oqarpoq:
- Neriuppugut attakut itsarsuarnitsat tamakku tammatsaaliorniarlugit assallugit qaqugu piiarneqarsinnaalissanersut paasisinnaalissallutigu. Paasissutissammi taakku nalissaqanngillat, eriagisassaallutillu, kingusinaartinnatalu tammatsaaliortariaqarpavut, Jørgen Hollesen, Politikenimut oqarpoq.
