Italiap ministeriunera tunuartoq
Giuseppe Contep Italiami ministeriunertut tunuarniuteqarniarnini præsidentimut Sergio Mattarellamut marlunngornermi nalunaarutiginiarpaa.
Conte nutaarsiassaqartitsivimmut Reutersimut ataasinngornermi unnukkut taama nalunaarpoq.
Contep nutaanik naalakkersuisoqatigiiliornissamut piginnaatitsissummik præsidentimit tunineqarnissani neriuutigaa. Politikkikkut tusarfiit nutaarsiassaqartitsivimmut Reutersimut taama oqarput, naalakkersuisoqatigiinnik politikkikkut siammasissumik pilersitsisoqarsinnaanissaa neriuutigineqarluni. Italiami nutaarsiassaqartitsiviit taama aamma allapput.
AAMMA ATUARUK Italiami politikerit EU-p coronap ajornartoortitsinerani ikiorsiissutaat pillugit aaqqiagiinngissuteqartut
Contep ministeriunertut tunuarnermigut naalakkersuisoqatigiinnik nutaanik pilersitsinissamut periarfissagissaarnerunissani neriuutigaa.
Italiami maannamut naalakkersuisoqatigiinni partii minnerit ilaat, Italia Viva, naalakkersuisoqatigiinnit ukioq manna siusinnerusukkut tunuarpoq, coronavirusip akiorniarneqarneranut atatillugu isumaqatigiinngittoqarmat.
Naalakkersuisoqatigiinni tamanna ajornartorsiulersitsivoq, Giuseppe Contemullu tatiginninnginnermik marloriarluni taasisoqarluni.
Conte taasinerni taakkunani aniguivoq, Italiamili naalakkersuinikkut suli ajornartorsiortoqarluni.