Italiami naalakkersuisut nunap ilaani qinersisoqareersorlu qasuersitsiarsinnaanngortut
Italiami nunap immikkoortuani Emilia-Romagnami inatsisartunut ippassaq sapaammi qinersisoqarmat angusarissaarnissani, partiip talerperlerneersup Legap neriuutigigaluarpaa, taamali pisoqanngilaq.
Lega Emilia-Romagnami qinersinermi angusarissaassappat Italiami naalakkersuisoqatigiit uppisinniarniarlugit, Legap siulittaasuata, Italiami nunamut namminermut ministeriusimasup Matteo Salvinip, sioorasaarutigigaluarpaa.
Qinersisoqarmalli qinersiartortut amerlapput, amerlanerussuteqartullu Det Demokratiske Parti, PD, Stefano Bonaccinimit aqunneqartumik qinersipput, nunasiniartunut isorinnittut qinigassanngortitaannut Lucia Boronzonimut ajugaalluarlutik.
AAMMA ATUARUK Partiit marluk Italiami naalakkersuisoqatigiilerput
Italiami nunamut namminermut ministereqarfiup pisortatigoortumik kisitsisaataasa tamanna takutippaat.
Salvinilli qinersinermi inernerit pakatsissutigai, qinersinissamummi atatillugu inunnik isumasiuinerit takutimmassuk Salvinip partia Lega PD-lu, Italiami naalakkersuisoqatigiinni Femstjernbevægelsen peqatigalugit siuttuusoq, naligiittorujussuussasut.
Qinersisartut 57 procentii qinersiartorput, 2014-imi qinersisoqarneranut naleqqiullugu marloriaatingajammik qinersiartortoqarnerulluni.