Italiami katersugaasiviit maajimi imerniartarfiillu juunimi ammaqqissasut
Italiap ammaqqikkiartuaarneqarnisssaanut pilersaarutit, Italiami ministeriunerup Giuseppe Contep sapaammi unnukkut saqqummiuppai.
Italiami innuttaasut marsip ulluisa qulinganniilli angerlarsimaannaquneqalerput.
Fabrikkini sanaartornermilu sulisut ataasinngorneq, maajip ulluisa sisamaanni suliartoqqissinnaalissapput, soorlu aamma parkit naatsiiviliarsuillu tamanit orninneqarsinnaasut ammaqqinneqassasut.
AAMMA ATUARUK Norgemi Rumaniamilu nakorsat peqqissaasullu Italiamukartut
Nunap immikkoortuinia ataasiakkaani angallannerit aamma ammaqqinneqassapput, tamannali akuersaarneqarsinnaasuussaaq soorlu ilaquttanut tikeraarneq.
Katersugaasiviit atuagaateqarfiillu maajip ulluisa 18-ianni ammaqqissinnaalissapput, imernartarfiit neriniartarfiillu juunip aallaqqaataani ammaqqissinnaanngussallutik.
Italiami atuarfiit septembarimi aatsaat ammaqqissinnaanngussasut ministeriunerup oqaatigaa.
Pisortat innersuussutaasa innuttaasunit maleqqissaarneqarnissaat, Giuseppe Contep kammattuutigaa.
- Italia asagukku qanillinaveersaarit, taanna oqarpoq.
AAMMA ATUARUK Italiamiut ukiuni tallimani parnaarussassanngortitaasinnaasut
Italiami inuit 26.600-nit amerlanerusut coronavirusimik toqquteqarsimapput, Europami nunani toqusuni amerlanerpaallutik, nunarsuarlu tamakkerlugu USA-mi coronavirusimik toqquteqartut amerlanerpaallutik.
Coronavirusimilli toqquteqartut ikiliartorput. Toqusut marsip ulluisa 14-ianiilli sapaammi aatsaat taama ikitsigisut nalunaarsorneqarsimapput.
/ritzau/