Inatsit allanngortoq: Isumassuisut meeqqanut qaninngoortut pineqaatissinneqariaannaanerusalissapput

Meeqqamut inuusuttumulluunniit tiinganiarsaraluni qaninngoorneq kannguttaatsuliornerluunniit inerteqqutaavoq.

Isumassuisunulli meeqqamut inuusuttumulluunniit akisussaaffigisaminnut taamaaliortunut immikkut kinguneqartalissaaq.

Inatsisartummi tamanna isumaqatigiissutigaat. Taamaammat pinerluttulerinermi inatsimmi aalajangersagarpaaluit tiinganiarnermut tunngasut Inatsisartut sukannernerulersillugit ukiaq allanngortitigaat Folketingip akuersineratigut juulip aallaqqaataani atuutilissapput.

Tassa meeqqanut inuusuttunulluunniit tiinganiarsaraluni qaninnguunnginnissamik kannguttaatsuliunnginnissamillu malittarisassat inersimasunut, meeqqanut inuusuttunullu akisussaasuusutut isumassuisuusunut, sukannernerulissapput. 

Isumassuisoq tassaasinnaavoq angajoqqaarsiaq, ilinniartitsisoq, perorsaasoq timersornermiluunniit sungiusaasoq. Tassa inersimasuuvoq meeqqanut inuusuttunulluunniit 18-liisimanngitsunut akisussaasuulluni isumassuisoq.

- Isumassuisuulluni taamaaliorneq sakkortuuliornerummat aalajangersakkat taakkua sukannernerulersinneqarput, Kalaallit Nunaanni Politiit unnerluussisuisa pisortaat Mariam Khalil KNR-imut oqarpoq.

Nunatsinni meeqqanut 15-iliisimanngitsunut kinguaassiuutitigut atornerluinermik nalunaarutiginninnerit siorna 250-iusut, politiit 2023-mut nalunaarutaanni kisitsisit takutippaat.

Sulianit taakkunannga qassit isumassortimit kannguttaatsuliorfigineqarnermut tunngasuunersut kasitsisaatigineqanngillat. Politiilli suliaat meeqqamik 15-iliisimanngitsumik kujanninnermut tunngasut 45-sut erserpoq. Suliaat taamaattut ukiuni kingullerni tallimani aatsaat taama ikitsigipput.

Tiinganermik assinik sms-inillu siammarterineq aamma inerteqqutaasoq

Meeqqanut inuusuttunullu tiinganiarsaraluni attaveqannginnissamik isumassuisunut malittarisassat sukannersooreerput.

Tassa tamat 18-iliisimasuusut meeqqanut 15-iliisimanngitsunut isumassuisullu meeqqanut inuusuttunullu 18-iliisimanngitsunut tiinganiarsaralutik attaveqaqqusaanngillat.  

Isumassuisoq assersuutigalugu meeqqamut inuusuttumulluunniit 18-iliisimanngitsumut kujanninnertaqanngikkaluarluni attuualaarinnittoq kannguttaatsuliortutut isigineqassasoq, pinerluttulerinermi inatsimmi erseqqereerpoq.

Meeqqamulli inuusuttumulluunniit taamaaliorneq sunaluunniit iliuuseqarfigineqassasoq, malittarisassartaani allaqqavoq.

Soorlu tiinganermik assinik sms-inillu meeqqamut inuusuttumulluuniiit nittarterinerusinnaavoq, inoqatinut attaveqaqatigiittarfinni siammarterinerusinnaavoq kujanninnertaqanngikkaluarluniluunniit tiinganiarsaraluni arlaatigut qanoq ilioqqusilluni kimigiisernerusinnaavoq.

- Tamanna isumassuisup kialuunniit meeqqamut inuusuttumulluunniit akisussaasuuffigisaminut tiinganiarsaraluni qaninngooqqusaanngilluinnarneranik kannguttaatsulioqqusaanngilluinnarneranillu oqariartornerulluinnarpoq, Kalaallit Nunaanni Politiineersoq Mariam Khalil oqarpoq.

Inuit Pisinnaatitaaffii pillugit Siunnersuisoqatigiit aamma Meeqqat Inuusuttullu Oqaloqatiginnittarfiat (MIO) inatsisip allanngorneranut tapersersuillutik, inatsissaq taanna pillugu tusarniaanermut politikerinut akissumminnni allapput.

Meeraq akuersisimagaluaruniluunniit pisuunngisaannartoq

Isumassuisut kannguttaatsuliorsimasutut pasisat, meeqqat inuusuttulluunniit attavigisimasaat akuersisimasut paasinarsigaangat, taamaaliorsimasutut pasisat suliani taama ittuni sakkukitsumik ilaatigut maannamut pineqaatissinneqartarput.

Meerarlu inuusuttorluunniit atisami qaavatigut attuualaarneqarnissamik akuersisimasoq uppernarsarneqarsimatillugu, maannamut aamma taamaappoq. Inatsisilli allanngornerani taamaakkunnaavippoq.

Tassa meeraq inuusuttorluunniit taamaaliorneqarnissamik akuersisimagaluarpalluunniit, isumassuisup taamaaliornera akuersaarneqanngilluinnartussaavoq.

Meerarmi inuusuttorluunniiit isumassuisumit taamaaliorneqartoq akisussaatinneqanngisaannassaaq.

- Meeraq inuusuttorluunniit taamaaliorneqartoq pisuunngisaannarpoq, Mariam Khalil oqarpoq.