Isumasioqatigiinnissaq sioqqullugu nalunaarusiortitsisoqarpoq

Nalunaarusiortuullutik Cowi Consult sullillugit Arctic Business Network aamma Sulisitsisut Peqatigiiffiat, tassa Nuummi aggustip 20-anni inuutissarsiorneq pillugu isumasioqatigiinnissaq sioqqullugu suliarineqartumik.

Nalunaarusiami nutaami tassani, siusinnerusukkut nalunaarusiaasartut assigalugit, Nunatsinni attaveqaqatigiinnikkut, inissianik sanaartornikkut aatsitassarsiornikkullu ineriartortitsinissamut periarfissat tikkuartorneqarput. Taamaattorli aamma oqaatigineqarluni, inuiaqatigiinni aningaasaliinerit pisariaqartinneqartut piviusunngortinneqarnissaannut, Nunatsinni aningaasarsiornikkut ineriartorneq apeqqutaajumaartoq. Matumanilu aatsitassarsiornermi aningaasarsiornikkut ineriartortitsinissaq pisariaqarluinnarpoq.

Nalunaarusiami oqaatigineqarpoq, ukiuni kingullerni ukiumut suliffiit 200-t missaat aalisarnikkut inuutissarsiornermi annaaneqartartut, tamatumalu allannguuteqarnissaa ilimanaateqarani. Suliffiit taamatut annaaneqartartut allatigut ineriartortitsinikkut taarserneqanngippata, soorlu aatsitassarsiornikkut, taava Nunarput aningaasarsiornikkut kinguariaateqassaaq.

Aalisarnikkut inuutissarsiornermi suliffiit annaaneqartut manna tikillugu aatsitassarsiornikkut, sanaartornerup ineriartortinneratigut, takornariartitsinikkut pisortallu sullissinerisigut arriitsumik taarseriartuaarneqarput. Ungasinnerusoq isigalugu allatigut nutaanik ineriartortitsisoqartariaqartoq oqaatigineqarpoq, taamaalilluni Nunarput avammut tunisassiornermigut akileraarutitigullu isertitamigut attaveqaqatigiinnermut, angallannermut, inissianut, avatangiisinut takornariartitsinermut pisortallu sullissinerinut akissaqalerniassammat, misissueqqissaarluni nalunaarusiami taama allassimavoq.

Oqaatigineqareersutut aggustip 20-anni Nuummi isumasioqatigiittoqarnerani nalunaarusiaq saqqummiunneqassaaq.