Isumaqatigiissutinik unioqqutitsinngilagut
Sara Olsvig (IA) Karl Lyberthimut § 37 naapertorlugu apeqqutigisimavaa, isumaqatigiissutinik unioqqutitsisoqarneranik danskit naalakkersuisuisa isumaqarneranik Naalakkersuisut isumaqatigineraat, Lyberthip tamatumunnga akissutaa erseqqilluinnarpoq, naagga. Maani nunami piujuaannartitsinissamik piniarneq uumasunullu tunngatillugu illersorneqarsinnaasumik piniarneq tunngavilersuutigineqarpoq. Nunami pinngortitap pisuussutaanik inuussutissarsiorfiusumi allamisulli iliorneruvoq.
-Akissut naammagisimaartupilussuuara. Isumaqatigiissutinimmi unioqqutitsinnginnerput isumaqataaffigaara, piujuaannartitsinissarmi tunngavigalugu IWC-llu ilisimatuussutsikkut ataatsimiititaliaata innersuussutai malillugit arfattassiissutivut aquppagut. Naalagaaffeqatigiit iluani angusaqarfiulluartumik oqaloqatigiissutigineqarnissaata qulakkeernissaa maanna pingaaruteqarpoq, taamaalilluta nunanut IWC-mut ilaasortaasut sinnerinut nukittuumik inissisimanissaput qulakkeerniarlugu, Sara Olsvig oqarpoq.
Naalakkersuisup Larl Lyberthip akissuteqaammini itisilersuilluni oqaatigaa, Namminersorlutik Oqartussat taamatut isummernerminnut nunat tamat suliniaqatigiiffii allat tunngavilersuutigigai, soorlu assersuutigalugu nunap inuiisa pisinnaatitaaffii pillugit ILO isumaqatigiissutaa 169 aamma nunat inuiisa pisinnaatitaaffii pillugit FN-imi isumaqatigiissut. Naalakkersuisoq aamma allappoq, nunat tamat akornanni pisassiisoqanngippat, soorlu matumani taama pisoqartoq, tamatuma aaqqinnissaanut IWC-p isumaqatigiissutaani aalajangersimasumik allaqqasoqanngitsoq. Tamannalu pissutigalugu Namminersorlutik Oqartussat nammineerlutik arfattassiisariaqarsimapput.
-Akissutaa tunngavilersorluagaallunilu ersarilluinnarpoq. Tamanna ilungersuutigiinnartariaqarparput. Pisuussutitta inuussutigiinissaannut tunngaviusumik pisinnaatitaaffeqarnerput, pisuussutinillu taakkuninnga atuinitsinnik ineriartortitsinissatsinnut pisinnaatitaaffeqarnerput matumani pineqarpoq, Sara Olsvig oqarpoq, Naalakkersuisullu folketingimut ilaasortaasut siunissami matumani suliaq pillugu qanittumik ilisimatitsisarnissaat neriuutiginerarlugu, suliaq Folketingimi ingerlaavartumik eqqartorneqartarmat.
