Isumaqatigiissut pisussaaffiliivoq
SAR pillugu isumaqatigiissut sumut atorsinnaavarput? Isumaqatigiissummi saqqummiunneqartumi atuarneqarsinnaavoq Nunatsinnut imatorsuaq pingaaruteqangaanngitsoq.
Qularutissaanngitsorli unaavoq, takornariartaassuaq amerikamiunik takornarianik ulikkaartoq, Nunatta sineriaani ajutuussagaluarpat ikiuunnissarput, tamannalu pissaaq Danmarkip ikiuunneratigut, soorlu sakkutuut imarsiortut ikortigalugit, taamaaliortussaatitaanerpulli pituttorsimanngitsumik isumaqatigiissutaavoq.
SAR-imit isumaqatigiissut malillugu Nunarput maanna pisussaaffilerneqarpoq pinngitsoorani ikiuuttussatut. Tassalu ikiuunnissarput maanna pituttugaasumik isumaqatigiissummi allassimalerluni.
- Annaassiniartarsinnaaneq pingaaruteqarpoq qangali ilisimavarput, taamaaliortarnittalu isumaqatigiissutigineqarnissaa qangali sulissutigilersimallutigu, tassami ajuvissortorsuarmik pisoqartinnagu annaassiniarnermi sutigut tamatigut piareersimanissaq uagut kissaatigaarput. SAR-imut isumaqatigiissut ippassaq atsiorneqartoq pillugu Naalakkersuisut siulittaasuat, Kuupik Kleist oqarpoq.
Isumaqatigiissummi 18-inik quppernilimmi pineqarpoq, imaani silaannarmiluunniit ajutoortoqartillugu issittumi nunat suleqatigiillutik inatsisitigut pisussaaffilerneqarmata ujaasinissaminnut annaassiniarnissaminnullu, aammalu inuit ajutoortut nunarsuarmi suminngaanneeraluarpataluunniit nunaasa paasissutissaannik pisariaqavissunik tuniorarnissaannik nunat issittormiut pituttugaalermata.
Isumaqatigiissut annaassiniarnerinnarmut taamaallaat tunngavoq. Illorsuarnik, annaassiniarnermut atortunik aamma aningaasanik qassinik illuartitsisoqassanersoq isumaqatigiissummi allassimasoqanngilaq.
Allassimavorli issittumi nunat ajutoortoqarnerani imminnut attaveqatigiittassasut, soorlu kina kimut sianissava nunat pineqartut attaviginissaannik isumaqatigiinnissanut, paasiniassallugulu timmisartunut mittarfik qaninnerpaaq sumiinnersoq, taamaaliornikkut paasiaarneqassammat naapparsimmavik qaninnerpaaq sumiinnersoq. Tassalu paasissutissat taamaattut issittumi nunat maanna avitseqatigiissutigisartagariligassaat.
Tamakku saniatigut issittumi nunat sungiusaqatigiittarnissaat suleqatigiinnerullu nalilersorneqarnissaa ataatsimiissutigineqartalissaaq.
Isumaqatigiissut Nunarput eqqarsaatigalugu annaassiniartarneq pillugu allanngungaartoqanngilaq. Immaqali annaassiniartarneq pitsanngortinneqaannarsinnaalluni.
- Annaassiniarnissaq pillugu Nunatsinni malittarisassaqarpugut. Isumaqatigiissutilli uuma allaanerussutigaa, ajutoortoqartillugu nunat eqqarlerisatta, soorlu Canadamiut aamma Islandimiut atortuisa atorneqarsinnaalerneri aammalu nunat taakku qanoq annaassiniariaaseqarnersut paasisinnaanngoratsigu. Tamanna ima paasineqarsinnaavoq uagut maani Nunatsinni annaassiniariaaserput nunani allani aamma atuuttuutinneqalissalluni.
Attaveqarnermut Naalakkersuisoq, Jens B. Frederiksen oqarpoq.
Ajutoortoqarnerani sillimaniarnerlu pillugit sungiusartoqassaaq ukiaru septembarimi, tamannalu Canadami pissalluni.
