Isumaqatigiissut nutaaq akuerineqartoq

Peqqinnissaqarfimmi sulisunut isumaqatigiissutissaq nutaaq pillugu pingasunngormat taasisoqarmat, 84-it akuersipput 84-illu akerliullutik — taamaalilluni taasititsineq qaqutigoorluinnartumik naligiiffiuvoq.

Tamanna Kalaallit Nunaanni Peqqinnissaq pillugu Kattuffiup, PKK-p, siulersuisuiniit ilimagineqarsimanngilaq, taamaattumillu qanoq pisoqassanera paasiniarlugu eqqartuussissuserisumut siunnersortiffissarsiorsimapput.

Tallimanngornermilu akissut tkkuppoq: Isumaqatigiissut akuerineqarpoq!

Taasineq naligiiffiugaluartoq, isumaqatigiissut akuerineqassanngippat, naaggaartut amerlanerussuteqarnerunissaat piumasaqaataavoq.

Taamaattumik isumaqatigiissut taasissutigineqareerluni akuerineqarpoq, isumaqatigiissummillu akuersinissaq ilaasortanut PKK-miit aallaqqaammulli siunnersuutigineqartoq, siulittaasup Ken Jensenip oqaatigaa.

- Soorunami isumaqatigiissutip nutaap akuerineqarnera nuannaarutigaarput, arlalippassuartigut atukkanut pitsanngorsaammat qularnanngilluinnartumik inuit malugissavaat. Inernerulli taama naligiiffiutiginera uggoralugulu pakatsissutigaarput. Taasineq erseqqissumik inerneqartikkusunnerusimagaluarparput.

Isumaqatigiissut peqqinnissaqarfimmi ulluinnarni pitsanngorsaaqataassaaq

Partiip malittarisassai naapertorlugit ataatsimeersuaqqittoqarsinnaanngitsoq, aalajangiinerulu allanngortinnissaanut inatsisitigut tunngavissaqanngitsoq, siulersuisut nalunaarummi ilaasortanut tallimanngornermi ullaakkut nassiunneqartumi allapput. 

Tamanna isumaqarpoq peqqinnissaqarfimmi sulisut ukioq manna isumaqatigiissut nutaaq piumasaraat, Ken Jensenillu upperaa tamanna peqqinnissaqarfimmi sulisut ulluinnarni sulinerannik pitsanngorsaataasinnaasoq:

- Sulisut aalajangersimasut pissarsiarinissaat neriuutigaarput. Aqutsisut oqilisaannissaat. Ulluinnarni suleqatit oqilisaannissaat. Suleqatigiittut pitsaanerusumik ataavartumillu attaveqatigiinnissaq, taamaalillunilu sulinerup pitsaanerulernissaa. 

- Ullumikkummi peqqissaasut 20-nik assigiinngitsunik atorfeqartitaapput. Taakku ikilisinnissaat neriuttigaarput, peqqissaasutut sulinissartik aallussinnaaniassammassuk.

Taasinerli naligiiffiutillugu isumaqatigiissummut iluariisimaarinninngitsoqarpoq.

Uparuartuutaasut erseqqarinnerpaat peqqinnissaqarfimmi aqutsisuninngaanneerput. Taakku siginiarneqarsimanngitsutut misigisimapput, taakkununnga aningaasarsiatigut iluarsiissutissat sulisunit allaniit kingusinnerusukkut aatsaat atuutilissammata.

Ken Jensen naapertorlugu ilaasortat naaggaartut isumagineqarnissaat sulissutigineqarpoq –  ilaatigut isumaqatigiissutip atuutilersinneqareernerani ataatsimiititsinerit aqqutigalugit malittarisassallu malinnaavigineqarnerisigut.

- Taamaattumik illuatungerput attaveqarfigilereernikuuarput, akuersinngitsullu akissarsiaasa nalimmassarneqarnissaannik siuarsaaniarnerput iluatsipparput, taamaalillutik pitsanngorsaanerit aamma taakkununnga iluaqutaapallanniassammata, Ken Jensen oqarpoq.

Akissarsiat ilassutillu sulisunik attassiinnassapput

Akissarsianillu nalimmassaanerit pitsanngorsaataasuni malunnarnerpaat ilagissagaat Ken Jensen oqarpoq — ingammik sulisunut aalajangersimasunut, aningaasarsiami qaavatigut ukiumoortumik akissarsisalerumaartunut piffissanilu nalinginnaasuunngitsuni sulinerminnut aningaasarsiaasa nalinginnaasut qaavatigut qaffasinnerusumik aningaasarsiaannut ilassummik siunissami tigusaqartalertussanut.  

- Assersuutigalugu unnuarsiortarnerup aningaasatigut pilerinarnerulersinneratigut, unnuarsiortarnerup, naluneqanngitsutut sulisunut artornartartup, unnuarsiorfissat sulisunut amerlanerusunut inissinneqarnerisigut, unnuarsiortarnerup sulisunut oqimaatsorsiutaanera annikillissasoq neriuutigineqarpoq, Ken Jensen oqaluttuarpoq. Aamma illoqarfinni sinerissamiittuni sulerusuttunut sumiiffinni tapit qaffanneqarput.

- Kalaallit Nunaanni najugaqartut, maani suliffeqarlutillu piffissaminnik atuisut immikkut isumagersusuppagut. AC-mimi taartaasunik atorfinitsitsisartut atorumanngilluinnarpavut. AC-imi sulisut aamma Kalaallit Nunaanni akileraarneq ajorput, akileraarutillu soorunami nunamiiginnarnissaat kissaatigaarput. Suleqatimmi taarseraannerat sulisunut ataasiakkaanut suliffimmilu avatangiisinut qanoq artornartigisoq nalunngilarput.

Naak isumaqatigiinnginneq qaqutigooraluartoq peqqissaasullu akornanni avissaartuuttoqaraluartoq Ken Jensenip neriuutigaa isumaqatigiissut nutaaq iluaqutigalugu siunissami peqqissaasutut sulilernissaq pilerinarnerulissasoq, peqqissaasullu aalajangersimasumik sulisoqalissasut.

Suliffimmili atugassarititat malinnaasariaqarput.

- Suliffigissalluta pilerinarpoq, suliffimmili atugassarititat pitsaasuunngippata uggornarpoq. Peqqissaasutut sulinerup nuannerluinnartorpassuartaanut aamma uggornarpoq, taanna oqarpoq.