Isumaqatigiissut: Illersornissaq pitsanngorsarneqassaaq - aamma Issittumi
Folketingimi amerlanerussuteqartut kunngeqarfiup illersorneqarneranut aningaasaliinerunissaq isumaqatigiissutigaat.
Ruslandip Ukrainemik saassussinerata kingorna piaarnerpaamik sakkusiortoqarnerunissaa pilersaarutaavoq, soorlu aamma nunat killiit illersoqatigiiffiannut NATO-mut ukiuni tulliuttuni qulini aningaasaleeqataasoqarnerunissaa pilersaarutaasoq.
- Nunarsuarmi ullut qulit kingulliit ingerlanerani allanngortoqarpoq. Februaarip ulluisa 24-ata siuliani Europa, februaarip ulluisa 24-ata kingorna allanngorpoq. Ministeriuneq Mette Frederiksen tusagassiortunut sassarnermi sapaammi oqarpoq.
Danmarki naalakkersuisut tamanna pillugu partiit Venstre, Radikale Venstre De Konservativellu peqatigalugit illersornissaq pillugu isumaqatigiissut nutaaq sapaammi isumaqatigiissutigaat.
AAMMA ATUARUK Ivan Ukrainimeersoq angerlapallakkusuttoq: Anaanaga ataatalu isumannaatsumukassapput
Danmarkimi illersornissaqarfiup ukiuni tulliuttuni marlunni nukittorsarneqarnissaa pillugu 7 milliardit koruunit sinnerlugit aningaasaliisoqassaaq. Tamatuma saniatigut Illersornissaqarfimmut aningaasaliisarnerit ukiuni tulliuttuni amerliartuaartinneqarnissaat pilersaarutaavoq, illersornissaqarfimmut aningaasaliinerit naalagaaffimmi tunisat ataatsimut nalingisa 2033-mi 2 procenterissagaat anguniagaalluni.
Danmarkip illersorneqarnissaa, atorfilittatigut oqaloqatigiinnerit, nunanilu assigiinngitsuni ikiorsissutinut aningaasaliisoqarniartoq ministeriunerup Mette Frederiksenip oqaatigaa.
Kalaallit Nunaata illersorneqarnerata nukittorsarneqarnissaa aamma pilersaarutaasoq, SF-ip siulittaasuata Pia Olsen Dyhrip oqaatigaa.
Aningaasat milliardilikkuutaat qanoq agguataarneqassanersut sumullu atorneqassanersut Christiansborgimi isumaqaitigiinniarnermi inissinneqaqqaassapput. Illersornissamut ministereqarfiup isumaqatigiinniarnerit qaqugu aallartissanersut suli ilisimanngilaa.
