Isumaqatigiinniarnerit sapaammi kaffisoqatigiinnermi aallartissagunarput

Sara Olsvig siumukkut assigalugit inatsisartunut ilaasortaatitaqalersoq partiit siuttui suleqatiginissaa anguniarlugit oqaloqatigilereerpai.
Kim Kielsen qinersinermi ajugaareerluni aqagu nalliutissaaq- kaffisortitsilerpallu partiit siuttui ornigutissanerpat? Tamanna pisinnaasoq, siumut allattoqarfianiit akerlilerneqanngilaq. Aamma oqaatigineqarpoq Kim Kielsenip isumaqatigiinniarnerit aallarnisarlugit siulittaasoqatini oqaloqatigereersimagai.
Aamma atuaruk Ilisimasalik: Enoksen nunatta aqutsisorileqqissavaa
Sulinerli ataasinngorpamut utaqqisariaqarpoq, partiip siulittaasuata nalunaarutigaa.
- Qineqqusaarneq sakkortooq ingerlatereerlugu ilaquttat piffissaqarfiginissaat pisariaqarpoq, Siumumiillu sapaassuarsiorluarnissaq kissaatigaarput, Siumut allattoqarfianiit taama nalunaaruteqarput.
Siumumi siulittaasup tullia, Jørgen Wæver Johansen KNR-mut oqaatigaa, partiit suittuisa oqaloqatigiinnissat ullup ingerlanerani pisussanut peqataajartorluni maanna Narsarsuarmiit Nuummukarluni. Ataasinngorpat naalakkersuisunngortitsinissamut isumaqatigiinniarnissat sioqqullugit partiip iluani piareersaasoqarnissaa ingerlanneqassasoq ilimanaateqarpoq. Kingullermik qinersisoqarneraniit Aleqa Hammondip Naalakkersuisooqatigiilersut sapaatit akunneri marluk qaangiummata nalunaarutigai.