Isumaqatigiinniarnerit nutaamik killiffeqalerput

Inuit Ataqatigiit siulittaasuat, Kuupik Kleist, taama ilisimatitsivoq. Isumaqatigiinniarnerni Siumut ilaanngilaq, ilaappulli Demokraatit, Kattusseqatigiit Partiiat aamma Atassut.

- Siunnersuutitsinnut tunngaviusumik apeqqutit arlallit ilaapput, partiinilli tusagaqartinnanga partiit tamarmik suli isumaqatiginiarneqarnersut oqarsinnaanngilanga, Kuupik Kleist oqarpoq. Apeqqutilli suut pineqarnersut oqaatigiumanngilaa.

Kuupik Kleist ualilluinnaraa oqarpoq isumaqatigiinniarnerit unnugu immaqa nangeqqinneqassasut, immaqaluunniit aqagu.

- Isumaqatigiinniarnerni piffissaq atorfissaqarteqaarput. Suli neriulluarpunga, immaqa aqagu isumaqatigiissuteqarsimassaagut, kisianni aamma oqarsinnaavunga tallimanngornerutinnagu isumaqatigiissuteqariissaagut, Inatsisartummi nutaat tallimanngorpat inissititerniarlutik ataatsimiittussaapput, Kuupik Kleist oqarpoq.