Isumannaallisaanikkut ajutoortoqarnerata upernaakkut ataatsimiinnerit kinguartikkai

Qitiusumik aqutsisoqarfimmi serverimi isumannaallisaanikkut ajutoortoqarnera upernaakkut ataatsimiinnissamut maanna kinguneqarpoq. Sapaatip akunnerani matumani ataatsimiinnissat tamarmik kinguartinneqarput.
Inatsisartut siuilittaasuata, Hans Enoksenip Namminersorlutik Oqartussat qarasaasiatigut isumannaallisaaniarneranni ajutoortoqarnera pissutigalugu sapaatip akunnerani matumani ataatsimiinnissat kinguartittariaqarai. Assi © : Jens Rafaelsen / KNR
Allattoq Signe Haahr Pedersen
marsip 29-at 2022 11:15

Politikerit Inatsisartut ataatsimiittarfianni sapaatip akunnerani matumani inatsisissatut siunnersuutit oqallisigalugit ataatsimiissanngillat.

Tamanna qitiusumik aqutsisoqarfiup serveriisa ilaanni ajutoortoqarneranik sulilu ajornartorsiutaaneranik pissuteqarpoq.

Naalakkersuisut Inatsisartuni ilaasortanut sulianut oqallisigineqartussanut paasissutissanik naleqquttunik tunniussiniarnerisa unammillernarnerat ilaatigut pissutaavoq.

Taamaammat ataatsimiittarfimmi sapaatip akunnerani matumani ataatsimiinnissat sapaatip akunnerata tullianut kingunartinneqarnissaat aalajangerneqarpoq, upernaakkullu ataatsimiinnerit tamarmik sapaatip akunnera 22-mut sivitsorneqarlutik.

Inatsisartut siulittaasuat, Hans Enoksen (N) tusagassiuutinut nalunaarummi paasissutissiivoq.

Sullissivik atorneqarsinnaaleqqittoq

Namminersorlutik Oqartussat unioqqutitsilluni isertoqarsimasoq tallimanngormat nalunaarutigaat.

Pisup qanoq ajoqutaasimatigineranik pakkersimaarinninnissarlu pillugit Namminersorlutik Oqartussat qitiusumik aqutsisoqarfiup serveriinit avammut avataaniillu attaveqarneq matuaat.

Mattussineq nittartakkat ilaannut isersinnaanermut sunniuteqarpoq, ilaallu atorsinnaanngivillutik.

Tamanna aallaqqaammut qarasaasiatigut aaqqiissuteqarfiusartumut NemID-mik atuisartumut sullissivik.gl-imut ilaatigut eqquivoq.

Tamannami maanna aaqqinneqareertoq, Namminersorlutik Oqartussat paasissutissiipput. Tassa sullissivik.gl-imut NemID atorlugu isersinnaaleqqipputit.

Ajornartorsiutaasoq sisamanngornermi aaqqinneqassasoq

Namminersorlutik Oqartussat sillimaniarnikkut ajutoorneq sapaatip akunnerata naanerani misissorneqarsimasoq ”ajutoorutaasullu pakkersimaarneqartut” marlunngornermi tusagassiuutinut nalunaarutigaat.

Sunali tamarmi aaqqitsinnagu isumannaallisaanermut tunngasut arlallit naammassineqaqqaassapput.

Namminersorlutik Oqartussat isumannaallisaaniarnerit pingasunngornerup ingerlanerani naammassineqarnissaat nalilerpaat.

Taamaammat suut tamarmik sisamanngornermi nalinginnaaleqqinnissaat naatsorsuutigineqarpoq.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk