Isumannaallisaanikkut ajutoorneq: Kommune Kujalliup 7 millionit akilernaveerai

Nunatsinni kommunini arlalinni allattuisoqaleruttorpoq.

Qitiusumik aqutsisoqarfiummi qarasaasiaasa serveriini isumannaallisaanikkut ajutoortoqarnerata tapiissutinut assigiinngitsumik toqqaannartumik nuussisarnerit unitsippai.

Tamanna kommunimi sulisut aningaasanik namminneq nuussisariaqarnerannik kinguneqarpoq.

- Kommune Kujallermi tallimanngormat kalerrinneqarpugut akiliilluta atortagarput ajutoortoq, Kim Rosendahl oqarpoq. Taanna Kommune kujallermi aningaasaqarnermut pisortaavoq.

AAMMA ATUARUK Unioqqutitsilluni isertoqarsimanera Sullissivimmut eqquisoq: NemId ataasinngornerup tungaanut atorsinnaanngilat

Avannaata Kommunia aamma eqqugaaqqavoq.

Avannaata Kommuniami suliffeqarfinnut akiligassanik akiliisinnaanngilaq. Taanna qarasaasiani atortorissaarut atorlugu toqqaannartumik ingerlasaraluarpoq, taannali Namminersorlutik Oqartussani isumannaallisaanikkut ajutoornermit aamma eqqugaavoq.

Akiligassat tallimanngorpaatinnagu akilerneqarsinnaanngitsut

Qitiusumik aqutsisoqarfiummi kommunit isumannaallisaanikkut ajutoortoqarnera pissutigalugu akiligassanik akiliinnginnissaannik piumasaqarfigai.

- Suliffeqarfinnut akiligassagut kinguaattooqqapput. Sisamanngormalli akiliigatta akileeqqinnikuunngilagut suli, Dorthe Løvstrøm oqarpoq. Taanna Avannaata Kommuniaani pisortaagallarpoq.

Qitiusumik aqutsisoqarfiup serveriini isumannaallisaanikkut ajutoortoqarnerata paasineqarnera pissutaasoq, Naalakkersuisut tusagassiuutinut nalunaarummi paasissutissiissutigaat.

Tamanna Namminersorlutik Oqartussat pisortat nittartagaanik arlalinnik atortorissaarutaanillu matoorineranik kinguneqarpoq.

Nunatta avannaani isumaginninnermi tapiissutit tamanna pissutigalugu nammineq nuussuinikkut ingerlanneqarput.

- Tassa taanna tallimanngormat ingerlapparput. Tassa systemi oqarutta nammineerluni ingerlasartoq akiliinissamut, taanna atornagu nammineq oqartarnitsituut "manuelimik tasterilluta" akiligassat ingerlappagut, Dorthe Løvstrøm oqarpoq.

AAMMA ATUARUK Isumannaallisaanikkut ajutoortoqarnerata upernaakkut ataatsimiinnerit kinguartikkai

Kommune Kujalliup tamanna aamma unammillissutigaa.

- Kommune Kujallermi amigaataasut maanna tassaapput suliffeqarfinnut akiligassat. Tallimanngormalli 5-7 millionit koruunit missaat bankimi piareeqqagaluarput. Kisianni taakkua ulloq manna tikillugu suli iluatsinngillat, Kim Rosendahl oqarpoq.

Illoqarfiit pingaarnersaanni innuttaasut 200-t eqqugaasut

Nunatta qeqqani tamanna pissutigalugu aamma ulapputtoqarpoq. Innuttaasummi 900-it missaanniittut isumaginninnikkut tapiiffigineqartarput.

Kommuneqarfik Sermersuumi isumaginninnikkut tapiissutersisartut 22-t aningaasat ataasinngormalli tigusassaraluatit suli tigunngilaat.

Innuttaasullu 200-it missaanniittut aningaasat aningaaserivimminni aqagu, sisamanngornermi takunavianngikkaat kommune paasissutissiivoq.

Namminersorlutik Oqartussat qarasaasiatigut isumannaallisaanikkut ajutoorneq ataasinngornermi aaqqiivigineqarumaartoq sapaatip akunnerata siuliani nalunaarutigigaluarpaat, sulili aaqqinneqanngilaq.

Tassungali taarsiullugu sisamanngornermi nalinginnaasunngoqqinnissaa naatsorsuutigineqarpoq.

Taamaammat Kommune Kujalleq ingerlaannarniarluni allatut pilersaarusiortariaqarpoq.

- Allatut ajornaqimmat immikkukajaaq ippassaq marlunngornermi iliuuseqarsimavugut. Tassa Sermersooq kommuniatuulli inunnik isumaginnittoqarfimmi tunngassutillit akiligassat nammineerluta nussorpagut. Soraarnerussutisiat meeqqanut akilersuutit pineqarput, Kim Rosendahl oqarpoq.

Sillimaniarnermi ajutoorneq Kommune Qeqertaliup atortorissaarutaanut sunniuteqanngilaq. Isumaginninnermi tapiissutit piffissaq eqqortoq malillugu tunniunneqarput.

Kommunip pisortaa, Nicolai Odgaard Jensen KNR-imut oqarpoq.