Nutaarsiassaqartitsivik: Isumannaallisaanermut siunnersorti, nukissiuuteqarnermut ministeri senatorerlu Pituffimmut angalaqataassapput

USA-p naalagaaffiata isumannaallisaanermut siunnersortaa Mike Waltz, USA-llu nukissiuuteqarnermut ministeria Chris Wright, Amerikamiut nunatsinnut tallimanngornermi tikeraarnissaannut peqataassasut naatsorsuutigineqarpoq.

TV 2 tusarfiit assigiinngitsut aallaavigalugit taama allaaserisaqarpoq. USA-mi nutaarsiassaqartitsivik CNN assingusumik allaaserisaqarpoq.

Republikanerit sinnerlugit senatorit ilaat Mike Lee aamma peqataassasoq CNN-ip allaaseraa. Trumpip Kalaallit Nunaannik aqutsilerusunneranut taanna tapersersuisuuvoq.

USA-p præsidentiata tullersortaa J.D. Vance nulialu Usha Vance, Pituffik Space Basemut tikeraarnermut tassuma saniatigut peqataassapput.

Taakku sisamat Pituffik Space basemut, Nuummut Sisimiunullu pisortatigoortuunngitsumik sapaatit akunnerata massuma ingerlanerani tikeraartussaagaluarput.

Nunatta oqaluttuarisaaneranut pingarutillit takuniarneqarnissaat, nunattalu kulturia pillugu paasisassarsiornissaq, Avannaatalu Qimussersuata malinnaavigineqarnissaa aallaqqaammut pilersaarutaagaluarpoq.

Kalaallit Nunaannut angalaqataaniarnini J.D. Vancep marlunngormat nalunaarutigaa, angalanermili pilersaarutit allanngortinneqarlutik Pituffik Space Base taamaallaat maanna tikeraarneqassaaq.

Mike Waltz Chris Wrightilu peqataanngiinnassasut tusagassiorfinnit arlalinnit kingorna isumaliutigineqarpoq. Tamannali pisortatigoortumik uppernarsarneqanngilaq.

Præsidentip tullersortaa nulialu nunatta nalunaaqutaa naapertorlugu ualeru nalunaaqutaq marlunut qiteqquppat tikissapput, USA-mullu ullup ingerlanerani uteqqissallutik.

Issittumi isumannaallisaaniarnermut tunngasunik ullup ingerlanerani paasissutissiisoqassaaq, amerikamiullu sakkutuui aamma naapinneqassallutik.