USA-mut akerliussutsimik takutitsinissamik aaqqissuisoq: - Ataatsimoornitta takutinneqarnissaa pingaaruteqarpoq
USA-p Kalaallit Nunaannik aqutsilerusulluni Kalaallit Nunaannut Danmarkimullu kimigiisernera killigisakkanik qaangiineruvoq.
Anders Franssen, inuit marluk allat peqatigalugit USA-p Københavnimi aallartitaqarfiata saavani akerliussutsimik arfininngorpat takutitsinissamik aaqqissuisoq taama isumaqarpoq.
Kikkulluunniit, aamma Kalaallit Nunaannut attaveqanngikkaluartulluunniit, Trumpip naalakkersuisoqatigiivisalu Kalaallit Nunaannut pissusilersuutaannut akerlioqataarusuttut taassuma akerliussutsimik takutitsinissamut peqataanissaannut kaammattorpai:
- USA-p pissaaneqarnini takutinniarsaraa. Tamanna akerliuffigissavarput, ataatsimoornerpullu takutissavarput, Anders Franssen KNR-imut oqarpoq.
Akerliussutsimik takutitsinissamut suliniuteqartut, Henriette Berthelsen Karen Littauerilu taakkununnga ilaallutik, tusagassiorfinnut ilaatigut ima nalunaaruteqarput:
"Nunat akornanni eqqissisimasumik attaveqaqatigiittoqarnissaa kissaatigaarput. Kalaallit Nunaat 100 procentimik tapersersorparput. Kalaallit Nunaat kalaallit pigaat!", taakku allapput.
Trumpip naalakkersuisoqataanit tikeraarniaraluartut pissutaapput
Akerliussutsimik arfininngorpat takutitsinissaq tusagassiorfinnut nalunaarutigineqarpoq, soorlu aamma inoqatinut attaveqaqatigiittarfikkut siammarterneqarsimasoq Folketingimilu partiinut nassiunneqarluni.
Kalaallit Nunaat kisimiinngitsoq, nunanilu tamalaanit tapersersorneqartoq, akerliussutsimik takutitsinissamik aaqqissuisut neriuutigaat takutinneqassasoq. USA-mmi Kalaallit Nunaat pillugu pissusilersuutai akuersaarneqarsinnaanngitsut, Anders Franssen oqarpoq.
USA-p præsidentiata tullersortaata nuliata Usha Vancep, USA--lu nukissiuuteqarnermut ministeriata Chris Wrightip, USA-llu naalagaaffiata isumannaallisaanermut siunnersortaata Mike Waltzip Sisimiunut Nuummullu tikeraarnissaat taamaatiinnarneqartoq akerliussutsimik takutitsinissamut pissutaavoq.
- Ataatsimoornitta takutinneqarnissaa pingaaruteqarluinnarpoq. Nunanik tiguaaniarneq, soorlu USA-p tamanna atortorisimagaa, oqaluttuaannanngornikuuvoq, Anders Franssen oqarpoq, nangillunilu:
- Kalaallit Nunaat tapersersorluinnarparput. USA-mit oqaaserineqartut akuersaarneqarsinnaanngilluinnarput.
Akerliussutsimik takititsinissaq politiinut nalunaarutigineqarnikuuvoq, Danmarkimilu arfininngornermi ulloqeqqaniit ualikkut nalunaaqutaq marluk tungaanut pisussatut aaqqissuunneqarluni.
