USA-mit nunatsinnut tikeraartoqarniarnerup allanngortinneqarnera Løkkep nuannaarutigigaa

Amerikamiut Kalaallit Nunaannut tikeraarniarnerannut pilersaarutit allanngortinneqarnerat nuannaarutissaavoq.

Danmarkip nunanut allanut tunngasunut ministeria Lars Løkke Rasmussen DR-ip radiokkut aallakaatittagaanut P1 Morgenimut pingasunngornermi ullaakkut oqarpoq:

- Amerikamiut Kalaallit Nunaannut tikeraarniarnerisa taamaatiinnarneqarnera nuannaarutissaasoq isumaqarpunga.

- Pituffimmi nammineq sakkutooqarfimminnut taarsiullugu tikeraarniarnerat ajoriinnagassaanngilaq, taanna oqarpoq.

Kalaallit Nunaannut tallimanngorpat tikeraarnissani, USA-p præsidentiata tullersortaata J.D. Vancep marlunngornermi unnukkut nalunaarutigaa.

Præsidentip tullersortaata nuliani Usha Vance Pituffik Space Basemut angalaqatigissagaa, præsidentip tullersortaata allattoqarfiata tusagassiorfinnut nalunaarutigaa.

Nunatta oqaluttuarisaaneranut pingaarutillit takornarniarneqassasut, nunattalu kulturia pillugu paasisassarsiortoqassasoq, Avannaatalu Qimussersua malinnaavigineqassasoq præsidentip illorsuata siusinnerusukkut nalunaarutigigaluarpaa.

USA-p naalagaaffiata siunnersortaa Mike Waltz, USA-llu nukissiuuteqarnermut ministeria Chris Wright angalaqataassasut nalunaarutigineqaraluarpoq. Taakku Kalaallit Nunaannut maanna tikeraartoqarnissaanut peqataassanngitsut maanna nalunaarutigineqarpoq.

Lars Løkke Rasmussenip oqarnera naapertorlugu Amerikamiut tikeraarnissamik pilersaarutitik nutaat Danmarkimut tatisineroriarnertut isikkoqartilerpaat. Angujumasarliuna angujumallugu avatangiisinut pissusilersornerusoq, ministeri naliliivoq. Aaqqiagiinneruleriartornerunani aaqqiagiikkunnaariartornerusoq, taanna isumaqarpoq.

Annertusiartortitsisoqarnani akerlianik annikilliartortitsisoqartoq Løkke isumaqarpoq.

USA-mit nunatsinnut tikeraartoqarniarnera, naalakkersuisuugallartut siulittaasorigallagaata Múte B. Egedep, Danmarkimilu ministeriunerup Mette Frederiksenip isornartorsiornikuuaat.

Kalaallit Nunaanni naalakkersuisoqatigiiliortoqaleruttornera ataqqillugu USA-mit tikeraartoqarniarunnaarnera isumatusaarnerusoq, Danmarkip illersornissamut ministeriata Troels Lund Poulsenip pingasunngornermi oqaatigaa.

- Ippassamut naleqqiullugu una isumatusaartumik alloriarnerusoq isumaqarpunga, Troels Lund Poulsen oqarpoq.