Isumannaallisaaneq tamakkiisumik suli qulakkeerneqanngilaq
Apeqqut taanna Danmarkimi aviisimi, MetroXpressimi, sapaatip-akunnerata ataatsip ingerlanerani oqallisaangaatsiarpoq. Inatsinilli nutaanik sukannernerusunillu Imarsiornermik Qullersaqarfimmit takkuttoqangajalerunarpoq.
Aviisimi allaaserineqartumi nutaami erserpoq, soorlu umiarsuarsuaq takornarniartaat 4.000-inik ilaasulik, putusimalluni immattuulissagaluarpat, imaatigut assartuilluni upalungaarsimaniarnermi qulimiguullit pingasut taamaallaat atorneqarsinnaasut.
Umiarsuit sananeqarnerisa pitsaassusaat Issittumi Sakkutooqarfimmi orlogskaptajnip, Michael Hjorthip, ernumanartoqartippaa:
- Umiarsuarsuit takornarniartaatit amerlaqisut sikusiornissamut qajannaallisarnikuunngillat, Kalaallit Nunaanni angalanissaat eqqarsaatigalugu sananeqarnikuunatik, taakkulu sikusiulissagaluarpata tamanna akisussaassuseqanngitsuliornerussaaq. Umiarsuarnik alapernaarsuutinik marlunnik, qulimiguulinnillu annaassiniutinik marlunnik, peqarpugut. Maani sumiiffiit imminnut ungasissorujussuupput, inunnillu taama amerlatigisunik qimagussuipallanissamut atortussaqanngilagut, Michael Hjorth aviisimut MetroXpressimut oqarpoq.
Michael Hjorth eqqartuussiviit qullersaanni eqqartuussissuserisumit aamma umiarsuarmi aquttuusimasumit, Peter Gierningimit, tapersersorneqarpoq, ajunaarnersuaqariataartoqarsinnaanerami taakku aamma ernummatigaat.
Umiarsuarsuit atorlugit takornarniartartut upalungaarsimanissaat pillugu aatsaat oqallittoqalinngilaq. Danmarkimi Imarsiornermik Qullersqarfimmimmi maanna ilimasaarutigineqarpoq, isumannaallisaanermut piumasaqaatit sukaterneqassasut.