Isumalioqatigiissitaq tusarniaaqqammerpoq

Canadami Ilumoortussaq pillugu isumalioqatigiissitaq sapaatip akunneri pingasut kingulliit atorlugit Nnavimmi Nunavummilu 70-ikkunni 80-ikkunnilu nerisaqarfiutigalutik atuarfinni nunap inoqqaavinik atuartunik naalliutsitsisarsimanerit pillugit tusarniaaqqammerput.

Tusarniaanermi naggueqatigiit Inuit qanoq misigisaqartarsimanitik oqaluttuarigaangatigik misigissutsinik attuisaqaat. Maannali tusarniaanerit naammassipput.

Isumalioqatigiissitami naggueqatigiinni Inunni kisiartaalluni ilaasortaasoq Peter Irniq, KNR-imut oqarpoq atuarfinni nerisaqarfiutigisuni naggueqatigiit Inuit misigisartagaat artornaraluartut tusaaniassallugit pingaaruteqarsimasoq.

Tusarniaanernut inuit 400-t missaat misigisaminnik oqaluttuariartorlutik takkupput, taakkunannga 300-t tamanut ammasumik oqaluttuarput, 100-lli missaanniittut Isumalioqatigiissitap ilaasortaanik matoqqasumik oqaloqateqarusussimallutik. Ilaqutariit avissaartuussimasut, inuunerit seqummakut, imigassamik atornerluinerit kiisalu imminut toqunnerit oqaluttuarineqarput.

Ilisimannittutut nassuiaatit tunngavigalugit Isumalioqatigiissitaq inassuteqaatinik arlalinnik saqqummiussaqassaaq. Sumiiffinni assigiinngitsuni "katsorsaasarfinnik" inuit ornigullutik oqaluttuariartorfigisinnaasaannik katsorsartiffigisinnaasaannillu inassuteqaatit minnerpaamik ataatsimik ilaqarnissaat, Peter Irniq-mit ilimagineqarpoq.

Naggueqatigiit Inuit ataasiakkaarlutik tamarmik nerisaqarfiutigisumi atuarfimmiissimanernerminnut ukioq siulleq 50.000 koruuninik, ukiullu tulliuttut tamaasa atuarfimmiinnerminnut 15. 000 koruuninik taarsiiffigitereerput. Aammattaaq ministeriunerup Harperip Canadap inatsisartuini naggueqatigiit Inuit pisortatigoortumik utoqqatserfigai.

- Maanna tusarniaanerit naammassineqarneranni atugarisimasavut ilisimaleratsigik kiisami siumut ingerlaqqissinnaalerpugut, Peter Irniq naggasiivoq.