Isumalioqatigiissitap naammassineranit ukioq qaangiuttoq: "Suli aaqqitassaqaqaaq"

Canadami Ilumoortussaq Saammaateqatigiinnissarlu pillugit Isumalioqatigiissitap ukiuni arfineq-marlunni sulinerani, Canada tamakkerlugu ataatsimiinnerpassuit ingerlanneqarput naggueqatigiillu Inuit, indianerit Metisillu tuusintilippassuit ilisimannittutut nassuiaataat katersorneqarlutik.

Isumalioqatigiissitap nalunaarusiaa Canadami nunap inoqqaavisa pitsaasumik siunissaqarnissaannut Canadamiullu kikkuugaluartut akornanni qanoq saammaateqatigiittoqarsinnaaneranut kaammatuutinik 94-inik imaqarpoq.

Isumalioqatigiissitap siulittaasuata, eqqartuussisup Murray Sinclairip, ukiumik ataasinngortorsiornermut atatillugu CBS Newsimut oqaatigaa, Canadami nunap inoqqaavisa qanoq inissisimanerat illorsuartut nassuiarneqarsinnaasoq, illorsuarmilu tassani inini tamani naneruummik ikitsisoqarpoq, naneruuterpassuilli allat aamma ikinneqarnissaat utaqqineqartoq.

Aamma atuaruk Canadami isumalioqatigiissitaq nalunaarusianik saqqummersitsisoq

Qaamanerlu taanna qanoq paasisariaqarpa? Nalunaarusiap saqqummersinneqarneranit ukiumi ingerlasumi susoqarpa??

Canadami naalakkersuisut indianerit reservatiini Inuillu nunaqarfiini ilinniartitaanermut, inissialiortiternermut allatigullu atortulersuutinut 40 milliardit koruunit aningaasaliissutigisimavaat.

Aamma arnat toqutaasimasut periarfeerussallu pillugit nuna tamakkerlugu misissuineq aallartinneqarpoq, Métisillu pisinnaatitaaffiisa amerlisarneqarnissaannik isumaqatigiissut Canadami naalakkersuisut atsioqqammerpaat, Canadalu nunani killerni kisiartaalluni høvdingimik arnamik inatsisinik atuutsitsinermut ministereqarluni.

Pisulli pingaarnersaat tassaavoq qanga qanoq pisoqartarsimanera aamma nunap inoqqaavisi qanoq naapertuilluanngitsigisumik pineqartarsimanerat nuna tamakkerlugu maanna eqqumaffigineqarnerulermat.

Taamaammat saammaateqatigiinnissamut pitsaanerusumillu inuuneqalernissamut alloriarneruvoq, naneruutilli ikitigassat suli amerlaqaat.