Isumaginnittoqarfimmi malinnaasinnaajunnaartut
Qaasuitsup Kommuniani isumaginnittoqarfimmi atorfiit 55-it inuttaqanngillat, tamannalu innuttaasunut ilungersunartorsiortitsisoq, kommunalbestyrelsip ataatsimiinnerani sulianik saqqummiussaani atuarneqarsinnaavoq.
Sulianik kommunalbestyrelsimut saqqummiussani isornartoqaqisumi, aviisip AG-p pingasunngornermi allaaserisaani, isumaginnittoqarfimmi unammillernartoqartoq naluaarutigineqarpoq.
Isumaginnittoqarfimmi sulisoqarniarneq ilungersunartumiittoq, saqqummiussami allaaserineqarpoq.
AAMMA ATUARUK Kommunip isornartorsiorneqarnini akueraa
Assersuutigalugu Ilulissani Aasiannilu utoqqaat illui aqutsisoqanngimmata aningaasartuutit malinnaavigineqarsinnaajunnaarsimapput.
Kommunillu ilaqutariinnut angerlarsimaffiutai arlaqartut aamma inuttassaaleqipput.
Ilaqutariit illui ilaqutariit inuuniarnikkut ajornartorsiortut ikorfartortussaammatigit, Uummannami ilaqutariit illuannik septembarimi ammaasoqarpoq.
Sulianilli saqqummiussani paasinarsivoq taassani suli atorfinitsitsisoqanngitsoq.
- Tamanna nammanneqarsinnaanngilaq, tassami Uummannami ilaqutariit inuuniarnikkut ilungersunartorsiortut naammaginartumik kiffartuunneqarsinnaanngillat, saqqummiussami allassimavoq.
- Innuttaasunik kiffartuussineq pitsaajunnaariartorpoq. Ilungersunarluinnartup killinga ornipparput, kommunip ingerlatsivia allappoq.
AAMMA ATUARUK Innarluutilinnut Danmarkimut inissinneqarsimasunut 491 millionit aningaasartuutigineqartut
Sulisoqannginnerup kingunerisaanik sulisut sinneruttut sulerujussuartariaqartartut, napparsimalluni nalunaartarnerit amerliartortut aamma paarlatsinik atuinerit malinnaavigineqarsinnaajunaariariartortut, kommuni allappoq.
Suliap inernera illuanut saatinneqanngippat kommuni avannarlissaq Namminersorlutik Oqartussanit isumaginninnermut naalakkersuisoqarfimmit nakkutigineqalersinnaasoq, Qaasuitsup Kommuniani pisortaqarfik sulianik saqqummiussani inerniliivoq.
