Kommunip isornartorsiorneqarnini akueraa
Nakkutilliiartortoqarnerata kingorna kommuni arlalinnik suliniuteqarpoq, ilaatigut ilinniartitsilluni sulisunillu amerlanerusunik atorfinitsitsilluni, isumaginninnermi pisortaq Henrik Soloy nakkutilliisoqatigiit nalunaarusiaannut oqaateqaateqarluni taama ilisimatitsivoq.
Suliassaqarfimmut amerlanerusunik aningaasaliisoqarsimanera aamma oqaatigaa, atorfiit nutaat 20-t pilersinneqarsimapput ilinniartitsinernullu pikkorissaanernullu aningaasaliisoqarsimalluni.
Isumaginninnermi pisortaq nakkutilliisoqatigiit nalunaarusiaannut akissuteqarluni allappoq kaammattuutigineqartut Qaasuitsup Kommuniata malinniarai isumaginninnermilu susassaqarfik 2017-imi immikkut suliniuteqarfigineqassasoq.
- Kommunip akisussaaffigisani akuersaarpaa naalakkersuisoqarfimmiillu, ombudsmandimit meeqqallu illersuisuannit nakkutilliiartorluni tikeraartoqarnissaa ammaffigalugu, Henrik Soloy taama allappoq.
AAMMA ATUARUK Nakkutilliisoqatigiit: Qaasuitsup Kommuniani assigiinngitsupilussuarmik ingerlatsisoqarpoq
Isumaginninnermilu pisortaq kommunip suliniutai pillugit nassuiaateqarnissaminut ulluni makkunani periarfissaqarluarpoq, isumaginninnermummi naalakkersuisoq Sara Olsvig kommunimi maanna angalavoq.
Naalakkersuisut suliniutiginiagaannut immersorneqarnissaq siunertaasoq, tusagassiorfinnut nalunaarummi oqaatigineqarpoq.
