Isumaginninnikkut sullissineq nukittorsarneqarli
Suliffissaaleqisut sullinneqarnerulernissaat Paninnguaq Tittusenip kissaatigaa:
- "Suliffissaaleqisut sullinneqarnerulernissaat ikiorneqarnerullutillu, soorlu pisortanit ikiorsiissutinik tunineqassagaangata aktiveringertittarlugit, soorlu Qallunaat Nunaanni taamaaliortartut, suliffittaarnissaat pimoorussinerunissaallu anguniarlugit", taamak Paninnguaq Tittusen 28-nik ukiulik oqarpoq.
Astrid Hardip illoqarfik kusassaannarnagu pinaveersaartitsineq ersarinnerusumik aallunneqarnerusariaqartoq aamma sammineqarnissaa amigaatigaa:
- "Illoqarfitsinni maani Nuummi eqeersimaarnerusumik pinaveersaartitsinermut sulisoqarnissaa ersarinnerusumik amigaatigaara. Allallu eqqartueqatigiikkaangatta maluginiartaratsigu una illoqarfik kusassarnissaa assut massakkut pingaartinneqartoq. Ajunngilaq taanna, kisianni inuiaqatigiinni taama artorsartoqartigisunik isigiinnalerluni isumaqarnarsisarami naak taakku pinaveersaartitsinermut sulisut, suliaat naammassimannginnamik immaqa taamaappoq, naluara, kisianni taamatut eqqarsaqqajaanartarpoq sumiginnarneqartut amerlavallaaqimmata." taama oqarpoq Astrid hard 56-nik ukiulik.
Erland Olsenip utoqqaat atugaasa pitsanngoriarnissaat neriuutigaa:
- "Utoqqaat atugarisaat pitsanngorsaavigineqassasut, nalunngilarpummi qallunaat nunaannut isaasalerlugu qimarrattartut amerlaqimmata. Maani nunannguatsinni utoqqaat atugarliortorujussuupput, taamatut ingerlaannassappat utoqqalinissaq qilanaarnanngitsorujussuuvoq. Utoqqaammi Kalaallit Nunaat qimakkusunngikkaluarlugu atugassarititaasut pillugit Qallunaat Nunaannut nuuttarmata" taama oqarpoq Erland Olsen 47-nik ukiulik.
Kommuninut qinersinissaq apriilip aappaani pissaaq.
Aasianni timersortarfimmi marsip 23-ani nalunaaqutaq 13.30-mit TV-kkut radiokkullu malinnaavigineqarsinnaavoq.
Tusagassiortunngornianit Dorthea Johansenimit Marina Reimerimillu suliarineqarpoq.