Isumaginninnermut aqutsisoqarfik Ivaaraq pillugu: Uagut akisussaanerpaavugut

- Sumiginnaanerujussuuvoq, ilumut taamaappoq. Sumiginnaanerulli sumiippiarnera inissittariaqarparput, taamaammat politiit nalunaarusiaat utaqqivarput, 

Isumaginninnermut aqutsisoqarfimmi pisortaq Helene Berthelsen sisamanngormat Ivaaqqami ataatsimeeqateqarnerminiit unillatsiarnermini KNR-mut taama oqarpoq.

Taassuma Ivaaqqami sulisut  ulloq naallugu ataatsimeeqatigai. Aaqutsisoqarfiup innarluutilinnut immikkoortortaqarfiani aqutsisoq tarnillu pissusaanik ilisimasallit pisortaat Qaqortumut angalaqatigisimasani peqatigalugit. 

AAMMA ATUARUK Annertuumik innarluutilimmut anaanaasoq: Paniga Ivaaqqamut pulaaqqusaajunnaartarpara

Taassuma taama Qaqortumut angalasariaqarneranut patsisaasoq tassaavoq; arnaq annertuumik innarluutilik 23-nik ukiulik sapaatip akunnerata siuliani nukappiaqqamik ernimmat, - arlaannaataluunniillu ilisimasimanngilaa taassuma naartusimanera. 

Ivaaqqami kinguaassiutitigut atornerluisoqarsimaneranik nalunaarutiginnittoqarsimasoq, Qaqortumi politiit uppernarsarpaat. Kujataanili politiit ittuat Søren Hansen pisup paasiniaavigineqarnera pillugu sukumiinerusumik oqaaseqarusunngilaq 

Kina pisumut akisussaasuua?

- Uagut atornerluisoqannginnissaanut akisussaanerpaavugut. Maanna politiit nalunaarusiaat tunngavigisassarput utaqqimaaqqaarparput, tigoreeriarutsigulu iliuuseqarumaarpugut. Akisussaasuunerpulli ilisimaarilluinnarparput.

Ivaaqqami ataatsimiinneq

Helene Berthelsenip Ivaaqqami sulisut aqutsisullu sisamanngormat ataatsimeeqatigai, ataatsimiinnerlu pillugu oqaasissai killeqarput. 

- Oqaatigisinnaavara, sulisut kingullertigut misigisaat maannakkorpiarlu tupaqqallutik misigisaat pillugit maanna tarnip pissusaanik oqaloqatiginnittoqarpoq, taanna oqarpoq.

Nangilluni nassuiaavoq angajoqqaat Ivaaqqamiittuutillit aamma taama iliorneqarumaartut.

Angajoqqaallu taakku Qaqortumut utimullu angalanissaat Isumaginninnermut aqutsisoqarfimmiit akilerneqarpoq.

Ivaaqqami sulisut peqatigalugit sulisut ulluinnarni sulinerminni najoqqutassiaq malittarsimaneraat misissorsimagitsik, Helene Berthelsen nangilluni nassuiaavoq, taannalu naapertorlugu, malitassiaq malinneqartarsimavoq.   

Taamaammallu taassuma sulisut sumiginnaasimasorinngilai.

- Suliassaq politiit suliaraat, naatsorsuutigaarpullu akiumaaraatigut, akissutaallu najoqqutaralugu periarfigiumaarparput, suliarmi ilungersunartuuvoq, sulisummi angajoqqaallu illersortussaavagut, Helene Berthelsen oqarpoq.

Pisup ingerlariaqqinnera 

Isumaginninnermut aqutsisoqarfiup politiit paasiniaanerat utaqqimaaqqaarusuppaa, taamaalioreerunik Kommune Kujalleq Ivaaqqamilu aqutsisut suleqatigalugit alloriarnermut tullermut ingerlariaqqikkumaarlutik erseqqissaatigaat. 

- Pisoq ataatsimut isigisariaqarparput, tassanngaanniit iliuuseqarumaarpugut.

- Imaanngilaq massakkut iliuuseqanngitsugut, politiilli paasiniaanerisa inernera qularnaareeriarutsigu iliuuseqaqqikkumaarpugut, Helene Berthelsen oqarpoq.

Ivaaqqami aqutsisunut kinguneqartitsisoqassanersoq apeqqummut oqarpoq, politiit misissuinerminni inerniliussaat aalajangiisuujumaartoq.

• Kalaallit Nunaanni politiit Ivaaqqami kinguaassiutitigut atornerluisoqarsimasoq uppernarsarpaat, tamannalu pillugu maanna paasiniaaleruttorput. Sisamanngormat septembarip 8-ni KNR-mut ilisimatitsipput pisumut atatillugu suli tigusarinnissimanatik.
• Meeqqanut, Inuusuttunut Ilaqutariinnut, Peqqissutsimullu naalakkersuisoq Mimi Karlsen (IA) septembarip tallimaanni KNR-mut oqarpoq Ivaaqqami pisut aallaavigalugit - Meeqqanut angerlarsimaffiutitsinnut assigiinngitsunik tamaniittuni misissuineq aallartinneqassasoq ilumut maleruaqqusat malinneqarnersut misissorneqassallutik.
• Tilioq Inuillu pisinnaatitaaffii pillugit suliniaqatigiiffik pisoq pillugu ipissumik isornartorsiuipput, ilaatigut Inuit pisinnaatitaaffii pillugit suliniaqatigiiffiup tamanna inuit pisinnaatitaaffiinik qaangiisoqarsimaneratut oqaatigaa.