Isukasia: Tusarniaanermut ikittuinnaat tusarnaariarput

Umiarsuarujussuit ikkarlissimasumit Vega Sagittariusimit quleriaamik anginerit Nuup kangerluatigut sapaatip akunneranut marloriarlutik ingerlaartalisapput saviminissamik aallerlutik. Tamanna pilersaarutavoq London Mining aatsitassamik qalluinissamut akuerineqassappat

Aatsitassarsiorfissap umiarsualiveqarfissaa aammalu aatsitassarsiorfik umiarsualivimmiit 100 kilometerisut ungasitsigisumiittussaq nunamik allannguingaatsiassapput. Tamanna pissaaq sulisut 1.500-ut 3.000-it missaanniittut aatsitassarsiorfissaq sanareerpassuk. Aatsitassarsiorfik ammasoq assagarsuussaaq 300 meterisut ititigisoq ujaqqerisut biilerujussuisa suliarissavaat saviminissaq piumaneqaqisoq qallorsinnaajumallugu.

London Miningip naatsorsuutigaa aatsitassarsiorfiup sananerani 13 milliarder koruunit atorneqarumaartut.

Tamakkuupput paasissutissat ilamerngi qalluinissamut qinnuteqaatip tusarniaassutiginerani London Miningimit saqqummiunneqartut.

Tusarniaalluni ataatsimiisitsineq siulleq Nuummi Ilimmarfimmi ataasinngornermi pivoq. Najuuttut 65-it missaanniipput taakkunannga 20-it missaat tassaapput atorfillit suliamut attuumassuteqartut. Inuit 40-45-ut suliamut attuumassuteqanngitsuupput taakkulu amerlagisassaanngitsut aaqqissuisut isumaqarput.

- Marloriaataanilluunniit amerlassusillit takkussimasuuppata nuannersimassagaluarpoq, ataatsimiinnermik aaqqissuisut KompetanceKompagniet-miit Jesper Kreiner oqarpoq.

Aatsitassanut naalakkersuisoq Ove Karl Berthelsen takkuttut taama ikitsiginerannut aamma pakatsivoq.

- Una suliassaq annertoorujussuuvoq inuiaqatigiinnut sunniuteqartussarujussuaq. Taamaammat takkuttut taama ikitsiginerat pakatsissutigaara, Ove Karl Berthelsen KNR-mut oqarpoq.

- Ataatsimiisitsinissaq pitsaanerusumik takoqqusaarutigineqarsimasariaqaraluarpoq, oqarpoq.

Taama isornartorsiuineq KompetanceKompagniet-imiit tusaatissatut tiguneqarpoq, taakkulu oqaatigaat tusarniaalluni ataatsimiisitsinissamut tullermut septemberip arfineq aappaanni Ilimmarfimmi pisussamut takoqqusaarnissamut periarfissaasinnaasut atorluarneqarumaartut.

- Ove Karl ilumoorpoq. Tusarniaalluni ataatsimiisitsinerit takoqqusaarutiginissaannut periarfissat atorluartariaqarpagut. Aamma isumaqarpunga ataatsimiinnermi tusarnaariatut najuuttut soqutiginarluinnartunik saqqummiussisut, Jesper Kreiner oqarpoq.

Ataasinngornermi tusarniaalluni ataatsimiisitsineq aallarnisaataaneruvoq. Tullianik ataatsimiinnermi inuiaqatigiinnut sunniutaajumaartut sammineqassapput.

Septemberip 27-ani aamma ataatsimiittoqaqqissaaq tassanilu avatangiisinut tunngasut sammineqassapput.