Isukasia qanoq ililluta iluanaarutiginerussavarput?
Illoqarfimmit 150 kilometerinik avannamut kangimut ungasitsigisumi Isukasiani London Miningip saviminiliorfiliorniarneranit Nuuk sunik pissarsissanersoq akissutissarsiniarneqassaaq.
Apeqqut taanna qaammatini tullerni akineqassangatinneqarpoq, aatsitassanut pisortaqarfiup, Kommuneqarfik Sermersuup aatsitassarsiorfiullu akornanni inuiaqatigiinni piujuartussamik iluaqutaasumik sunniutissanik nalilersuineq IBA-mik isumaqatigiissummik taaneqartartoq isumaqatigiinniutigineqarpat.
IBA isumaqatigiissutaavoq suliniutinut angisuunut soorlu aatsitassarsiorfiliornermi inuiaqatigiit taassuma qanittuaniittut qanoq ilillutik annertunerpaamik iluaquserneqassanerannut imaluunniit kingunipiluusinnaasut qanoq killilersimaarneqarsinnaanerannut
tunngasoq.
IBA-mik isumaqatigiissut tamanut saqqummiunneqartussaavoq, sulialli ingerlanera piumasaqaatillu isumaqatigiinniartunit sammineqartut isertuunneqartussaasut, Sermitsiaq allappoq.
- Taamaattorli ilisimaneqareerpoq suliniummi mikisualuit pillugit ammasumik pissuseqarnissaq pingaaruteqarluartuusoq illuatungeriit isumaqatigiissusiussappata suliffeqarfimmut kalaallinullu iluaqutaasumik, taama erseqqissaavoq
Montrealimi eqqartuussissuserisuni Gagné Bennettimit eqqartuussissuserisoq Gilles Gagné, isumaqatigiinniarnermi Kommuneqarfik Sermersuumut ikiuuttussaq.
- Siullerpaatut kommunimut siunnersuutigaara London Mining qinnuigineqassasoq suliniut pillugu atortussat tamaasa tunniutissagai. Ilisimagutsigu assersuutigalugu maskiina London Miningip qaqugu qanorlu annertutigisumik atortussaagaa sanaartornerullu nalaani suliassat assigiinngitsut qaqugu naammassineqassanersut, taava paasisavut amerlanerussapput. Takusinnaalissavarput suut pisariaqarnersut qanorlu ilineratigut nunaqavissut suliffeqarfiutaat sulisussallu nunatsinneersut sulianut neqeruussanersut, Gilles Gagné oqarpoq.
Taanna 1977-mili eqqartuussissuserisutut sulisimavoq IBA-mik isumaqatigiissutit immikkut ilisimasaqarfigalugit Canadami indianerit naggueqatigiit sinnerlugit aatsitassarsiorfinnut taamaattunut isumaqatigiinniartarluni.
