Isukasia milliardilikkaanik isertitsissutaasinnaavoq
Aatsitassarsiortitseqatigiiffik aatsitassarsiornissamut pilersaarutit aningaasalersornissaat pillugit Kinami aningaaserivinnut sapaatip akunnerani matumani isumaqatigiinniarpoq, pilersaarutillu piviusunngortinneqarsinnaaneranik qaammatit arlaqanngitsut qaangiuppata nalunaaruteqarnissaq naatsorsuutigineqarluni.
Naatsorsuinerit Berlingskemit paasineqartut najoqqutaralugit, aatsitassarsiorfik ukiuni 15-ini akileraarutitigut akitsuutitigullu 32 milliardit koruuninik isertitsissutaassaaq. Taakkunannga 15 milliardit koruunit Danmarkip pisussaavai, tassa ukiumoortumik tapiissutit 3,4 milliardit koruuniusut ikilisinneqartussaassammata.
Aatsitassarsiornermilli milliardilikkaanik isertitsissutaasussat qanoq agguataarneqassanersut mianersortumik oqallisigineqalerpoq.
Maanna isumaqatigiissutaasut naapertorlugit ataatsimoortumik tapiissutinut atatillugu Danmark amerlanerusunik pisassaqanngilaq. Danmark amerlanerusunik pissappat nutaamik isumaqatigiinniartoqartariaqarpoq.
Nunanut allanut tunngasunut siornatigut ministeriusimasup, Per Stig Møllerip, Nunarput pillugu ataatsimiititaliamut ilaasortaasup, ataatsimiititaliaq septembarimi Nunatsinnut tikeraarpat, agguaaqatigiittarnissaq oqaluuseritinniarpaa.
- Isumaqatigiinniarnerit Naalagaaffeqatigiinnerup ataannarsinnaaneranut misiligutaassapput. Uagut piumasaqaativut naammaginngikkunikkik Kalaallit Nunaat naalagaaffeqatigiinnermit avissaaginnarumaarpoq, Per Stig Møller Berlingske Businessimut oqarpoq.
