Isukasia: Kinamiorpassuit SANA-mi ulapaartitsisinnaapput
Isukasiani aatsitassarsiorfissarsuup sananeqarnerani sulinermi ajutoortoqarsinnaanera ilimanarpoq. Ajoqusernerit anginerit Nuummi Dronning Ingridep napparsimmavissuani suliarineqartassapput.
- Isukasiani nakorsiartarfimmut eqqaanartumik peqassaaq tassanilu ikiueqqaarsinnaasunik sulisoqassaaq. Kisianni ajoqusernerit annertuut tassani suliarisinnaassanngilagut, London Mining Greenlandimi pisortaq Xiaogang Ho KNR-mut oqarpoq.
Taamaammat annertuumik pisoqartillugu Dronning Ingridep napparsimmavissuani sulisut ulapaartinneqartassapput ullumikkut nukiit tamaasa atorlugit suliassarpassuit naammassiniarneqartarput.
Isukasianut suliartortussat Nunatsinnut aallartigatik peqqissutsimikkut misissorneqartassapput
Taamaakkaluartoq London Mining Greenland A/S-ip naatsorsuutigaa peqqinnissakkut sullinneqarnissamik pisariaqartitsisoqarumaartoq soorlu kigutileriffinni aamma tagiartuisarfinni. Sullinneqarnissamik pisariaqartitsinerit ilaat namminersortunit suliarineqarsinnaassasut ilimagineqarpoq.
Tusarniaanermi najoqqutassiani London Mining A/S allappoq suliassarsuaq nunatta iluaqutigiumaaraa landkarsip isertitaqarnerulerneratigut aammalu suliffissat amerlinerisigut. Naatsorsuutigineqarpoq ukiut 15-it ingerlaneranni aningaasat 35 milliarder koruunit landskarsip isertikkumaarai. Aatsitassarsiorfik ingerlalerpat naatsorsuutigineqarpoq sulisut 4-500-ut pisariaqartinneqassasut.
Taamatulli annertuumik suliaqartoqarnerani aporfiusinnaasutut taaneqarput sulinermut atatillugu ajutoornerit amerlinissaat aammalu isumaginninnermut tunngasutigut aporaattoqarsinnaanera.
Aatsitassanik qalluinissamut qinnuteqaat London Mining Greenland A/S-ip Namminersorlutik Oqartussanut tunniutereerpaa. Tusarniaaneq oktoberip 19-ata tungaanut ingerlavoq. Tusarniaalluni ataatsimiinneq unnugu nalunaaqutaq 19.00 Nuummi Ilimmarfimmi pissaaq. Tassanilu suliassarsuup inuiaqatigiinnut sunniutissai kisimik sammineqassapput.
Suli nalunarallarpoq qinnuteqaat Namminersorlutik Oqartussat qaqugu isummerfigiumaarneraat.
- Tusarniaanerup naammassineraniit qaammatit arlallit qaangiunneranni aatsaat pisinnaagunarpoq. Nukinngussamik akissuteqarnissaq naatsorsuutigineqanngilaq. Imaassinnaavoq ukiup affaa angullugu akissutissatsinnut utaqqisariaqassasut. Qinnuteqaat akuerineqassappat naaggaarneqassappalluunniit tunngavilersorluagaasumik akissut suliarineqartussaavoq tamanna sivisuumik suliassaavoq, Ove Karl Berthelsen KNR-mut oqarpoq.