Issittup isumannaatsuunissaa aatsaat taama isumakulunnartigisoq
Illersornissaqarfiup isertortumik misissueqqissaartartuisa aarlerinartoqarneranik nalilersuinerminni Issittoq 167-eriarluni eqqaavaat.
Aamma USAp, Ruslandip aamma Kinap Issittumi saqitsaannerujartuinnarnerat allaaserineqarpoq.
Tamanna USA-p Kinallu nunatsinnik soqutiginnikkiartuinnarneranik peqquteqarpoq, ilutigisaanillu Rusland avannarpasissortamini kiterpasissortaminilu sakkutuuminik amerrlisaalluni.
Inatsisartut nunanut allanut sillimaniarnermullu ataatsimiititaliaata siulittaasup, Aleqa Hammondip (NQ) Danmark aatsaat taama ernumatigisoq misigaa.
- Ukiuni arlaqartuni issittulerngusaanneq sakkortusiartorneranik taamannak isumaqarpoq. Aamma aatsaat taamak erseqqaritsigisumik issittulerngusaannerup peqqutigisaanik Kinamiut, Russit Amerikamiullu iluminnik annertusiartortumik aaqqiiagiinngissutaasinnaasunik danskit illersornissamik suliaqartuaniit aarlerinartutut naliliisoqarnera aatsaat takuara, Aleqa Hammon oqarpoq.
Aningaasat amerlanerusut atorneqassapput
Danskit illersornissaqarfiat amerlanerusunik aningaasalersorneqartariaqartoq taanna isumaqarpoq.
Ataatsimiititaliap siulittaasuta tulliata Mimi Karlsenip (IA) oqariartuut isumaqatigaa. Nunatta qarasaasiatigut sioorasaarneqarnissamut isumannaannerunissaa anguniarlugu arlaqartunik atorfinitsitsisoqartariaqartoq taanna isumaqarpoq.
Pingaartumik nunanut allanut naalakkersuisup Ane Lone Baggerip eqqunngitsumik USA-mut allagaqartittuusaartinneqarnerata kingorna.
AAMMA ATUARUK Immikkut ilisimasalik: Allagaq eqqunngitsoq pissaanilissuit imminnut ajorniarfiginerannut takussutissaasinnaavoq
- Internetti aqqutigalugu allakkanik eqqunngitsunik siammarterisarneq, piviusuunngitsunik piviusuusaartitanik. Tassa tamakku aallarnisarsinnaaneri isumaqarpunga pingaartorujussuaq tamakku nakkutigilluaqqissaarnissaa,
Illersornissaq pillugu danskit ernumanerata saniatigut nunarput allanik aamma atorluaasinnaasoq, Aleqa Hammond isumaqarpoq.
- Mannakkoqqissaaq danskit oqartussaaffiini nunatsinni atuuttut ukiumi kingullerni annertoorujussuarmik pitsanngorsartariaqartutut inissisimaneri atorluarlugit tamakku isumaqatiginninniarnermi aaqqiissuteqartariaqarput, Aleqa Hammond oqarpoq.
