Issittup imartaanni umiarsuit angalasut pillugit Inuit oqaloqatigiittariaqarput

Taamaattumik naalagaaffiit killeqarfii akornutiginagit naggueqatigiit inuit imminnut oqaloqatigiiittariaqarput, piginneqatigiiffiup Makiviup Canadami Nunavimmi siulittaasua Pita Aatami oqarpoq.

- Kalaallit suleqatigerusuttorujussuuagut, Pita Aatami nangippoq.

Issittumi sikusarnerata annikillineratigut umiarsuit angisuut soorlu umiarsuit takornariartaatit angalasinnaanerat periarfissaqarnerulerput.

- Piginneqatigiiffik Makivik Corporation umiarsuarnik takornariartaatinik ingerlataqaqarpoq. Takornariartaat Cruisenorth pigisaraa, aasarumiillu aallartilluni Kalaallit Nunaannut angallassisarniarpoq, siulittaasoq Pita Aatami oqarpoq.

- Umiarsuit takornariartaatit allat Kalaallit Nunaata Canadallu akornanni angalasalernissaat naatsorsuutigineqarpoq, umiarsuit takornariartaatit issittumi angalasartut nuannarineqaleraluttuinnaramik, Pita Aatami oqarpoq.

- Taamaattumik pingaaruteqarpoq naggueqatigiit inuit tamarmik suleqatigiinnissaat. Uagut nunagaarput, uagut nammineq qanoq iliuuseqarutta ajunnginneruvoq, Pita Aatami oqarpoq.

Issitumi nunat illersorneqarnissaat pingaaruteqartorujussuusoq ilanngullugu Pita Aatamip oqaatiga, tamannalu nagguteqatigiit Inuit Kalaallit Nunaaniittut, Alaskamiittut Canadamiittullu suleqatigiinnerisigut anguneqartariaqartoq oqaatigalugu.

Pita Aatami Inuit Issittormiut Siunnersuisoqatigiiffiat ICC Nuummi juunip naalernerani ataatsimeersualerpat peqataassaaq.