Nalunaarusiaq: Issittup imartaa 2040-mit aasaanerani sikuusassanngilaq
![](/sites/default/files/styles/image_934x467/public/article_images/is_nasa_kathryn-hansen_flickr.jpg?itok=87Wiu83U)
Issittumi silap nunarsuup sinnerani silap agguaqatigiissillugu kiassuserisartagaanut naleqqiullugu ukiuni kingullerni 50-ini marloriaammik sukkanerusumik kissatsikkiartornera nalunaarusiami naqissuserneqarpoq. Danmarkip Radioa taama allaaserineqarpoq.
Gassinik nunarsuup silaannaanik kissatsikkiartortitsisunik aniatitsinerup annertusiartuinnarnera tamatumunnga pissutaanerpaavoq. Aamma silap pissusiata allannguutai takuneqarsinnaallualereerput, Jesper Theilgaard, silap pissusia pillugu Danmarkip Radioani immikkut ilisimasalittaasoq taama oqarpoq.
- Kalaallit Nunaata sermiata aakkiartornerata 2008-miilli marloriaatinngorsimanera 1995-imiillu arfineq-marloriaatinngorsimanera nalunaarusiami ersersinneqarpoq, Theilgaard taama oqarpoq.
Tamannalu pingaartumik Issittumi malunniutissaaq, Issittummi imartaata 2030-kkut naalernerini aasaanerani sikuusannginnissaa naatsorsuutigineqarmat.
Nunarsuarmi imaviit aamma ukiut untritillit atukkatta naajartornerini centimeterinik 25-nik qaffassimassangatinneqarput.
Danskit nukissiuuteqarnermut, pilersuinermut silallu pissusianut ministeriata Lars Christian Lilleholtip (V) nalunaarusiaq ilumoorunnerarpaa nukissiuutinillu mingutsitsinngitsunik atuinerulernissaq aallunneqarnerusariaqartoq Danmarkip Radioanut oqaatigalugu.