Issittup imaata kiannerunera pissutigalugu sikuniaasaassasoq

Danmarkimi Silasiorfik DMI naapertorlugu, tamanna imaata nalinginnaasuunngitsumik kianneruneranik pissuteqarpoq.

- Issittumi imartani sikuunngitsuni tamani maanna pisarnermit 4 gradinik kianneruvoq, sikumik ilisimatusartoq Rasmus Tonboe DMI-p nittartagaani taama allaaserisaqarpoq.

Canadap avannaani, Alaskami Ruslandimilu imartani upernaaq siusinnerusukkut sikuernera pissutigalugu imaq pisarnermit kissarnerungaatsiarpoq.

Taamaattoqarneratalu sapaatit-akunnerini aggersuni ukiornissaanullu imartat sikujartornissaannik kinguarsaavoq. Tamannalu Issittumi sumiiffinni takuneqarsinnaasumik kinguneqarpoq, sumiiffinnimi arlalinni qajannaatsumik ukiunilu arlalissuarni sikusartuni maanna sikuunngilaq imaluunniit sikutarasaaginnarluni.

Aamma atuaruk Aasaanerani kiannerpaaffiusoq nillernerpaaffiusorlu qaangerneqartut

Taamaammat sumiiffinni taakkuni imartat aasaru sikuertussanngorpata ukiup sikuanik saattuinnarmik qallersimassapput sivisunngitsumik atasinnaasunik.

Siku issusooq qajannaatsorlu maanna Issittumi kiserngoruttoq aamma nalaalluni inissisimavoq, sikummi Qalasersuaq aqqusaarlugu Nunatta Svalbardillu akornanni Framstrædekkut ukiorpat ingerlaalissaaq. Imaata sikua taamaalilluni kujasinnerusumut anngutissaaq aannissaalu allaqqunneqarsinnaanavianngilaq, sikumik ilisimatusartoq Rasmus Tonboe DMI-p nittartagaani taama allaaserisaqarpoq.

Issittup imaata sikuata aasaanerani siaruarsimanera 2007-imiilli 1970-ikkunnut, 80-ikkunnut 90-ikkunnullu naleqqiullugu annikitsuinnaasarpoq, Issittumilu silaannaap kissatsikkiartuinnarneranik pissuteqarluni.

Taamatullu sukkatigisumik ingerlasoqaannassaappat, silap pissusianik siulittuinerit naapertorlugit 2100-kkut qiteqqunnerini Issittumi aasakkut sikoqartassanngilaq.