Aasaanerani kiannerpaaffiusoq nillernerpaaffiusorlu qaangerneqartut
2016-imi aasaanerani sila sutigut immikkuullarissuseqarnersoq silap pissusiani ilsimatuup John Cappelenip Danmarkimi silasiorfiup DMI-p nittartaaganut ima nassuiaateqarfigaa.
- Naatsorsuinerit takutippaat Tasiilami juulip qaammataani 0,1 mm-iinnarnik siallersimasoq. Tasiilami uuttortaasoqartalermalli aatsaat taama pisoqarpoq, uuttortaasarnerillu 1898-imi aallartinneqarput, ilisimatooq DMI.dk-mut taama oqarpoq.
Nunatsinni aasaq manna kiangaatsiarpoq. Uuttortaanernili rekordi alla tassaavoq nillissutsikkut rekordiliisoqarsimanera.
Aamma atuaruk Asiaq sila pillugu nutaamik nittartagaqalersoq
DMI-p silasiorfiani sermersuup qiterpasissuaniittumi Summitimi aggustip aallaqqaataani minus 30.7 °C nalunaarsorneqarpoq, tamannalu Summitimi juulip qaammataani nalunaarsorneqarsimasuni nillernerpaavoq. Siornatigut rekordiusoq tassaavoq minus 27.7 °C, 1992-imi juulip 30-ani nalunaarsorneqartoq.
Aggustip qaammataani nalunaarsorneqaraluartoq juulimi nalunaarsukkanut ilaatinneqartoq, John Cappelenip oqaatigaa.
- Uuttortaaviup juulimi uuttortagaani nillernerpaavoq. Rekordilu juulip qaammataanut ilaatinneqarpoq, ulloq-unnuarlu uuttortaanerup aggustip aallaqqaataani nalunaaqutaq 06.00 UTC naasup iluaniimmat, Cappelen oqarpoq.
DMI-p Sermersuarmi silasiorfimmi Summitimi nalunaarsugai ataani takuneqarsinnaapput.