Issittup ilisimatusarfigineqarnera annertusiartuinnarpoq
Tamanna pillugu Qallunaat nunanut allanut tunngasunut ministeriaqarfiata, Nunatta Universitetia, Savalimmiut universitetia aamma qallunaat universitetii arfineq pingasut suleqatigalugit 'Issittoq pillugu ilisimatusarnermi oqallittarfimmik' taallugu pilersitsivoq.
Universitetit assigiinngitsut Issittumi suna pillugu sunillu suliaqarnersut ilisimajumallugit oqallittarfik pilersinneqarpoq, ilaatigut DMI aamma GEUS suleqatigineqarlutik.
Taamaaliornikkut anguniarneqarpoq, ilisimatusarnerup nukittorsarnissaa aamma paasisanik avitseqatigiittarnissaq anguniarneqarluni.
Oqallittarfimmik pilersitsineq, Issittoq pillugu Ilisimatusarfimmi, Aarhusip Universitetiani aqutseqataasup, professor Jesper Madsenip qujaruppaa.
- Ilisimasatta allanit ilisimalerneqarnissaat pikkoriffiginerusariaqarparput. Assersuutigalugu Kalaallit Nunaannut ilisimasassarsiorniartilluta soqutiginnittunik allanik suleqateqarniarnissarput pikoriffiginerusariaqarlutigu, taamaalilluta paasisatta annertunerusumik allanit atorneqarsinnaaneri angussagatsigu, Jesper Madsen Danmarks Radiomut taama oqarpoq imalu nagilluni.
- Ilisimasassarsiornermut aningaasartuutissat taama ikitsigitillugit, ilisimasassarsiornerni pitsaanerusumik suleqatigiinnissaq aamma soqutiginnittunut allanut siumut nalunaartarnissarput pikkoriffiginerusariaqarparput, tassami ilisimasassarsiorneq unamminertut isigilissanngikkutigu taamaaliortariaqarpugut, Jersper Madsen oqarpoq.
Ilisimatusarnermi inernerit pingaarutillit aamma pilersaarutit suunersut ukimut ataasiartumik nalunaarsiortarnissaat siunertaavoq, nalunaarusiamissaaq ilisimatusarfigineqarsinnaasut allaaserineqartassallutik.
Kalaallit Nunaanni, Savalimmiuni aamma Danmarkimi Ilinniartitaanermut Ilisimatusarnermullu Naalakkersuisut ukiumut ataasiarlutik ataatsimeeqatigiittarnissaat aamma siunenrsuutigineqarpoq.
