Issittup ilisimatuarfigineqarneranut aningaasaliissutit isumannaarniarneqartut

Aningaasanut inatsisissatut siunnersuummi aappagumit 2017-ip tungaanut Issittoq pillugu ilisimatusarluni suliniutinut ukiumut 19 mio. koruunit immikkoortinneqassapput. Aningaasaliissutillu ukiormannamut naleqqiullugit amerleriaateqalaarput, ukiormanna 18 mio. koruuniugamik. 2012-imulli naleqqiutissagaanni ikinneerarsuupput, taamani suliassaqarfimmut pineqartumut danskit aningaasanut inatsisaanni 99 mio. koruunit immikkoortinneqarsimammata.

Danmarkimi Nunatsinnillu ilisimatusarfinni issittumi pissutsit pillugit ph.d.-tut post doc-itullu suliniutinut ukiuni tullerni aningaasaliissutissat affaasa missaannik tapiiffigineqassapput.

Tamatuma saniatigut aamma Arctic University, ilisimatusarfiit ilinniartoqarfiillu Issittumut soqutigisaqartut suleqatigiiffigisaat, 2017-ip tungaanut ukiumut 3 mio. koruuninik tapiiffigineqartassaaq.

Nunatta nunavittaata ikkannertaata Naalagaaffiit Peqatigiit Imaani pisinnaatitaaffiit isumaqatigiissutaannut atatillugu nalunaarsorneqarnissaanut misissuinerit pisariaqartut aamma 2018-ip tungaanut ukiumut 1,5 mio. koruuninik aningaasaliiffigineqartassapput.

Aammattaaq Tunup avannaarsuani ilisimatusarfik Zackenberg, 2018-ip tungaanut ukiumut 3,5 mio. koruuninik aningaasaliiffigineqartassaaq.

2015-imut aningaasanut inatsisissatut siunnersuut Folketingimi ullumi siullermeerneqassaaq.