Issittumi uuliasiortoqarnissaanik akuersisoqaqqittoq
Statoilip suleqataatalu Svalbardip kangiani aappassaanik misileraallutik qillerinissaannut akuersissummik tunineqarsimasut, Norgemi Uuliasiornermut pisortaqarfiup, Oljedirektoratet, Shippingwatchimut ilisimatitsissutigaa.
Qilleriffigineqartussaq nunarsuarmi avannarpasinnerpaassaaq, tamannalu avatangiisinik illersuiniaqatigiiffiup Greenpeacep sakkortuumik qisuariaateqarfigaa.
Statoilip uuliasiornissaa Greenpeacep unitsinniarsaraa
Qillerinissamut siullermut akuersissummik tunniussisoqareersorlu qillerivik Transocean Spitsbergen Greenpeacemeersunit ikiffigineqarpoq. Uuliasiorluni qillerinissamut akerliussutsimik atsiortitsisaqattaarnermi Greenpeace atsiornerit 125.000-it sinnerlugit katersorsimavai, taakkuli Norgemi avatangiisinut ministerip tigujumasimanngilai.
Greenpeace Statoilimut akerliuniarpoq
Greenpeacemeersut Bjørneøp eqqaata uumasunik eqqissisimatitsiviusup qillerivimmillu kilometerinik 170-inik ungasitsigisumiittup eqqugaasinnaanera ernumagaat.
Akuersissut Statoilimit Conoco Phillips, OMV aamma Petoro peqatigalugit pigineqarpoq.
