Issittumi upalungaarsimanerup pitsaanerulernissaanik pisariaqartitsoqartoq danskit politikerinit paasineqalerpoq
Umiarsuup takornariartaatip Explorerip Sikuiuitsoq kujallermi umiuneratut issittumi pisoqassagaluarpat ajutoorfiusumut piaartumik apuussinnaanissaq Issittumi Sakkutooqarfimmit takujuminaatsinneqarpoq.
Umiarsuaq takornariartaat Explorer Sikuiuitsoq kujallermi 2007-mi umiummat, umiarsuarnik takornariartaatinik ingerlataqartunik eqiiallatitsivoq.
Tusagassiortoq: Umiarsuit takornariartaatit umiunissaat pinngitsoortissinaavarsi
Tusagassiortut upalungaarsimaniarneq politikerinut oqaluuserisassanngortikkusukkaat
Issittumi Sakkutooqarfimmi pisortaq Michael Hjorth oqarpoq, Sikuiuitsoq kujallermi avatangiisit issittumi aamma atugaasut.
Issittup imartaani aamma Kalaallit Nunaata avataani uuttortaasoqarnikuunngilaq - issittup imartaani imannaanngitsumik sila aamma ajortarpoq, Michael Hjorth oqarpoq.
Tusagassiortut oqaluttualiaat Den Antarktiske Engel - Sikuiuitsoq kujallermi inngili - ullumi saqqummersinneqarpoq - oqaluttualiami tassani danskit politikerii Kalaallit Nunaanni upalungaarsimanermut oqartussaasut eqeersarniarneqarput. Danskit politiikeriisa issittumi upalungaarsimanermut pisariaqartinneqartut paasisimagaat, Michael Hjorth isumaqarpoq.
Danskit ministeriunerata Helle Thorning-Schmidtip Folketingemi ukiakkut ataatsimiinnermi Issittumi pissutsit pingaarnerutinneqassasut oqalugiarnermini eqqaavaa.
Helle Thorning-Schmidt iliuuseqartoq Issittumi sakkutooqarfimmi pisortap maluginiarpaa.
- Kalaallit Nunaanni upalungaarsimaneq tamakkiisoq illersornissamullu qullersaqarfiup oqartussaaffiinut tunngasut ilanngullugit misissuisussanik suleqatigiissitanik arlaqartunik 2014-imi pilersitsisoqarpoq, Michael Hjorth oqarpoq.
- Suleqatigiissitaliat suliaat ukiup naalernerani saqqummertussamik nalunaarusiarineqassapput, taakkualu issittumi suliniutit nukittorsarneqarnissaannnut isumassarsiorfiussallutik.
Tamannalu pillugu aningaasanik immikkoortitsisoqassasoq Michael Hjorth neriuppoq.
- Assigiinngitsutigut pitsaanerulersinnaavugut. Inunnik annaassiniarnermut atortulersuutit atugassiissutigineqartut periarfissatsinnut aalajangiisuupput, Issittumi Sakkutooqarfimmmi pisortaq oqarpoq.
Pissutsitigut assigiinngitsutigut pitsanngoriaateqartoqarsinnaavoq - tassunga atatillugu Michal Hjorthip eqqaavaa annaassiniarnermik sungiusarnerni Sareximi, 2012-imi 2013-imilu ingerlanneqartuni, Kalaallit Nunaanni pisortat Norgemik, Islandimik Canadamillu suleqateqarlutik - sungiusarnerni taakkunani Kalaallit Nunaata imartaani umiarsuarmik takornariartaammik umiusuusaartitsipput.
Sungiusarnerit taakkua iluatsilluartut Michael Hjorth isumaqarpoq. Tamanna pissutigalugu issittumi nunat suleqatigiinnerat iluatsilluarpoq, Issittumi Sakkutooqarfimmi pisortaq Michael Hjorth oqarpoq.
Oqaluttualiaq Den Antarktiske Engel - Sikuiuitsoq Kujallermi Inngili - atuakkanik saqqummersitsisarfiup Zetlandip nittartagaani zetland.dk-imi pisiarineqarsinnaavoq.
