Issittumi suleqatigiinnerup unitsinneqarnera: Rusland Danmarkimut aarlerisaarisoq

Nunat Issittumi Siunnersuisoqatigiinni ilaasortaasut suleqatigiinnerat aallarteqqittariaqarpoq.

Russit Danmarkimut aallartitaat Vladimir Barbin, aviisimi Berlingskemi taama issuarneqarpoq.

Russit Issittumi Siunnersuisoqatigiinni siulittaasuuffeqartut Ukrainemut saassussinerisa kingunerisaanik Issittumi Siunnersuisoqatigiit sulinerat unitsinneqarpoq.

AAMMA ATUARUK Russit saassussinerata issittumi suleqatigiinneq unitsikkallaraa

Danmarkip nunallu allat Issittumi Siunnersuisoqatigiinni ilaasortaasut, avatangiisinik illersuineq, silap pissutaanut tunngasut, peqqinnissaq, imartat pillugit suleqatigiinneq kiisalu piujuaannartitsinermik tunngaveqarluni ineriartortitsineq oqaloqatigiissutigisarpaat.

Danmarkip nunallu allat arfinillit Issittumi siunnersuisoqatigiinni ilaasortat, tassa USA-p, Canadap nunallu avannarliit, russit Ukrainemut sakkutuulersornerat kiisalu Issittumi Siunnersuisoqatigiinni suleqatigiinneq immikkoortittariaqaraat, russit Danmarkimut aallartitaat, Barbin isumaqarpoq.

Aallartitap oqarnera naapertorlugu suleqatigiinnerup unitsinneqarnera kingunerluuteqangaatsiarsinnaavoq.

- Najummassimanartorsiortitsinissaa kissaatigingilara. Issittumi Siunnersuisoqatigiilli uninnganerisa suleqatigiinnissaq piujuaannartitsinermillu tunngaveqarluni ineriartortitsinissaq ajornarnerulersippaat, Barbin oqarpoq.

- Nunap assinga qiviarukku takusinnaavat nunat tamalaat, Rusland issittumut sineriaqarnerpaasoq minillugu, Issittoq pillugu suleqatigiinniassappata tamanna isumaqarnavianngitsoq, Barbin Berlingskemit issuarneqarpoq.

AAMMA ATUARUK Ilisimatooq: Issittumi Siunnersuisoqatigiit suleqatigiiginnarnissaat neriuutigaara

Taassuma Ruslandip Issittumi sineriaqarnerpaanera innersuussutigaa.

Ilisimatuut Berlingskep oqarloqatigisaasa Danmarkimut aallartitaq eqqortumik oqalunnerarpaat. Tamanna assersuutigalugu umiarsuarmik annaassiniarnermik suliaqarnermut aamma uuliamik aniatitsisoqarneranut tunngasinnaavoq. Taakkulu nunat suleqatigiinngippata kingunerluuteqarsinnaavoq.

Illersornissamut ilinniarfimmi ph.d-p aamma lektorip, Camilla Tenne Nørup Sørensenip Issittoq tassanilu sillimaniarnermut politikki ilaatigut ilisimatusarfigaa, taassuma nunat issittumi unammillernartut namminneq aqussinnaanngikkaat oqaatigaa.

- Sumiiffinni annertuuni unammillernartoqangaatsiarlunilu mianernartoqarpoq. Assersuutigigaanni uuliamik aniatitsisoqaraluarpat tamanna kingunerlungaatsiarsinnaavoq. Tamatuma saniatigut Rusland naalagaaffiit annersaraat, taamaat suliassat tamakku Rusland peqatiginagu suliarinissaat takujuminaappoq, taanna Berlingskemut oqarpoq.

Mikkel Runge Olesen Dansk Institut for Internationale Studierimit (DIIS) ilimatuujuvoq, taassumalu Issittoq naalagaaffiillu allanut attaveqartarnerat immikkut ilisimasaqarfigai, taassuma Camilla Tenne Nørup Sørensen isumaqatigaa.

Ilanngullugulu Rusland issittumut tunngatillugu pingaaruteqangaatsiartoq oqaatigaa. Ruslandillu nunani killerni sikumik aserorteruteqarnerungaatsiarnera asseruutigaa.

Danskit nunanut allanut tunngasunut ministeriata, Jeppe Kofodip (S) Danmarkimut aallartitap oqaaserisai oqaaseqarfigerusunngikkai Belingske allappoq.