Aalisarneq Issittumi suleqatigiinneq isumaqatigiissuteqarnikkut qulakkeerneqassaaq

Issittup imartaani ingasaassilluni aalisarneq pinngitsoortinniarlugu nunat tamalaat isumaqatigiissutaat nunatsinni atsioqatigiissutigineqassaaq.

Naalagaaffiit aalisartoqarfissuusut qulit kiisalu EU ukiuni arlalinni isumaqatigiinniareerlutik Issittup imartaata qiterpasissuani aalisarneq pillugu malittarisassat pitsaasumik oqaloqatigiissutigineqarnissaat qulakkeerniarlugu isumaqatigiissusiortussanngorput.

- Isumaqatigiissut asseqanngilaq oqaluttuarisaanermullu ilaalluinnarluni, ajornartorsiutip pilinnginnerani naalagaaffiit quliusut aaqqiiffigimmassuk. Issittumi siunissami aalisarsinnaaneq isumaqatigiissutikkut mattunneqarnavianngilaq, taamaattoq nunarsuatsinni imartani innarlerneqanngitsuni kingulliit ilaanni aqunneqanngitsumik ingasaassilluni aalisarneq pinngitsoortissavaa, aalisarnermut piniarnermut nunalerinermullu naalakkersuisoq, Erik Jensen, taama oqarpoq.

Issittup imartaata qiterpasissuani siunissami eqqissisimatitsisoqarnissaa isumaqatigiissummi pineqanngilaq, isumali tunngaviusoq tassaalluni naammattumik ilisimasaqalernissap aamma piujuaannartitsinissamik tunngaveqarluni atuinissamut malittarisassat pisariaqartinneqartut atuutilersinnagit aalisarneq ammaanneqassanngitsoq. Malitarisassiornermilu ilisimatuussutsikkut paasisat kisiisa tunngavigineqanngillat.

Isumaqatigiissutimmi immikkoortuisa ilaanni Issittumi nunap inoqqaavisa soqutigisaat, aalajangiiniarnerni nunap inoqqaavisa najukkamilu inuit ilisimasaasa naleqassusiat aamma suliap ingerlaqqinnerani nunap inoqqaavisa najukkamilu inuit najugallit peqataanissaasa qulakkeerneqarnissaat pineqarpoq.

Aalajangiiniarnerni peqataasut tamarmik isumaqataasarnissaat aamma ilaatinneqarpoq.

Isumaqatigiissutip atuutilersinneqannginnerani nunanit tamanit akuerineqarluni atsiorneqaqqaassaaq, tamannalu ulluni oktobarip aappaanit sisamaanut pissaaq. Aalisarnermut, Piniarnermut Nunalerinermullu Naalakkersuisup Erik Jensenip naalagaaffiit atsioqataasussat sinniisui Ilulissani Hotel Arcticimi  persuarsiorpalaartumik atsioqatigiinnissamut qaaqquai. Nunani allani aalisarnermut ministerit, nunanut allanut ministerit aamma aallartitat atsioqataanermut peqataassapput.

- Isumaqatigiissummut pingaaruteqarluinnartumut naammagisimaarinnilluinnarpunga, ukiuni arlaqalersuni unammillernartumik isumaqatiginniutaareerluni atsiorneqartussamut. Tulluussimaarutigeqaaralu nunatsinni persuarsiorpalaartumik isumaqatigiissut atsiorneqassammat, Erik Jensen taama oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl