Issittumi siunnersuisoqatigiit Nobelip nersornaasiuttagaanut innersuunneqartut

Eqqissinissaq pillugu nersornaasiuttakkamut ataqqisaasumut Issittumi siunnersuisoqatigiit maanna piukkunneqarput. Siunnersuisoqatigiit Canadami 1996-imi pilersinneqarput, killeqarfiillu akimorlugit nunat issittumiittut arfineq pingasuusut suleqatigiiffigaat.

Naalagaaffeqatigiit,  suliniaqatigiiffiillu arfinillit tassani atajuartumik ilaasortaapput,  taakkununnga ilaallutik Issittumi nunap inoqqaavisa suliniaqatigiiffii, tassalu aamma ICC, Inuit Cirkumpolar Council aamma ilaalluni.

Taakku saniatigut nunat assigiinngitsut aamma alaatsinaattutut ilaasortanngorsimapput.
Issittumi siunnersuisoqatigiit sulinerminni sammisartagaat tassaapput avatangiisit, inuit pisinnaatitaaffii, silap pissusaata allanngoriartornera allarpassuillu nunanut issittumiittunut tunngasut.

Ilinniagartuut 60-it nunanit assigiinngitsunit 20-neersut issittormiut suleqatigiiffiat taanna nersornaasiuttakkamut ataqqisaasumut innersuussimavaat.

Canadami nutaarsiassaqartitsivik CBC News naapertorlugu innersuussinermut tunngavilersuutigineqarsimavoq, Issittumi siunnersuisoqatigiit suleqatigiinnertik pitsaasoq ingerlatiinnarsimammassuk, naak piffissami matumani assigiinngissitaarneq pasinapiluttutut isigineqartaraluartoq, nunallu assigiinngitsut akornanni suleqatigiinnerit saassutarineqartaraluartut.

Nunani Issittumiittuni suleqatigiinneq atorneqartuarsimavoq, kissaatigineqaannarani aammali inuuinnarniaraanni pisariaqartutut isigineqarmat.

Issittumi siunnersuisoqatigiit eqqisisimasumik suleqatigiinnissamut malitassiuisuuvoq, taamaattumik Nobelip eqqissinissamut nersornaasiuttagaa pissarsiarisariaqarpaat, tigusisussatut innersuussisut tunngavilersuipput.