Issittumi Siunnersuisooqatigiinni alaatsinaattuunissamik kissaatit akerlerineqartut
Nunat issittormiut tamarmiullutik Issittumi Siunnersuisooqatigiit Sverigep avannaani illoqarfimmi Kirunami maajip qaammataani ataatsimiittussaapput. Ataatsimiinnermi oqaluuserisassaq tassaavoq nunat NGO-llu arlariit Issittumi Siunnersuisooqatigiinni alaatsinaattunngortinneqassanersut aalajangiiffigineqarnissaat.
Kina, Korea Kujalleq EU-lu alaatsinaattunngornissamik qinnuteqarsimasut ilagaat. Danmarkillu Kalaallit Nunaatalu nunat tamaasa kissaataat ilaleraluaraat, imaasiallaannaq akuerineqarnavianngillat. Issittoq pillugu aallartitaq Klavs A. Holm taama naliliivoq.
-Piviusorsiussagutta suliami matumani ajornartorsiutit arlalinnit saqqummiunneqarsimapput, taamaammat nunat taakku tamakkerlugit akuerineqassanersut maannakkorpiaq oqaatigisinnaanngilara.
Qularnerpaat tassaapput Rusland, USA Canadalu, taakkumi Issittumi Siunnersuisooqatigiit alaatsinaattut taama amerlatigisut aqussinnaassaneraat taakkunanngalu politikkikkut tatisimaneqarneq annertuallaalersinnaasutut ernumagineqarpoq. Canadap puisinik eqqusseqqusiunnaarnermut tunngatillugu EU-p alaatsinaattunngortinneqarnissaa iluarinngilaa. Danskilli kalaallillu tungaannit qangali isummerfigineqareersimavoq:
-Nunat taakku suleqatigiissitani sulianut ilisimatusarnikkut ineriartortitsinikkullu tunniussaqarsinnaasoraagut. Nunat Kinatut, Korea Kujallertut Japanitullu ittut ilisimasarpassuaqarput, ilisimasallu taakku Issittumi Siunnersuisooqatigiinni pitsaasumik atorneqarnissaat kissaatigaarput, Klavs A. Holm oqarpoq.
Nunanut tunngatillugu taama inissisimasoqarpoq, NGO-nulli assigiinngitsunut arfineq marlunnut Issittumi Siunnersuisooqatigiinni alaatsinaattutut akuerineqarnissamik qinnuteqarsimasunut tunngatillugu isumaqatigiittoqarpallaanngilaq:
-Tassunga akissutigiinnassavara nunat tamanna suli eqqartorsimanngikkaat. Aamma isertuunneqassanngilaq NGO-t qinnuteqarsimasut ajornartorsiutaasinnaammata. Tamattami ilisimavarput nunat issittormiut ilaasa assersuutigalugu Greenpeace iluarivallaanngikkaat. Kisianni tassa suli isumaqatigiinniutigineqarpiarsimanngilaq.
Nunat arfinillit, suliniaqatigiiffiit qulingiluat NGO-llu aqqanillit Issittumi Siunnersuisooqatigiinni alaatsinaattooreerput, qinnuteqaatillu allat marluk 2015-imi suliarineqartussaallutik.
Alaatsinaattut Issittumi Siunnersuisooqatigiit ataatsimiinnerinut peqataasinnaatitaapput aammalu allakkatigut oqaaseqaateqarsinnaatitaallutik. Aammattaaq suleqatigiissitani peqataasinnaapput, taakkunanilu oqalleqataasinnaatitaallutik. Taamaaliorsinnaatitaanissamulli piumasaqaatit arlariit akuereqqaartariaqarpaat, soorlu assersuutigalugu naalagaaffiit namminersortuunerat aammalu innuttaasut kulturikkut naleqartitaat. Arctic Frontiersip Norgemi januaarimi ataatsimeersuartitsinerani Kinap Norgemi aallartitaa oqalugiarnermini oqarpoq Kinap piumasaqaataasut tamaasa akuerigai. Alaatsinaattullu tamanna assammik isaassinertut paasivaat.
Issittumi Siunnersuisooqatigiit Kirunami maajip 15-iani ataatsimiinnermi makku alaatsinaattutut akuerineqarnissamik qinnuteqaataat isummerfigisussaavaat:
Kina, Japan, Korea Kujalleq, Singapore, India, EU kiisalu NGO-t Oceana, Association of Oil and Gas producers (OGP), Ospar Kommissionen, Greenpeace, Nunat tamat Hydrografi pillugu suliniaqatigiiffiat (IHO), Nunarsuarmi Silarsiornikkut Suliniaqatigiiffikn (WMO) aamma Association of Polar Early Career Scientists (APECS).
