Issittumi Sakkutooqarfiup nutarsarnera Nunatsinnut iluaqutissartaqartoq

NATO-p umiarsuit aqqartartut saassussinnginnissaannik ukkatarinninnerulernera Nunatta USA-mut suleqateqarneranut iluaqutissartaqarsinnaasoq, ilisimatooq isumaqarpoq, Issittumilu Sakkutooqarfik maani Nunatsinni sakkutuujunngitsunut suliassanut nukissaqarnerulissalluni.
Assi © : KNR
juunip 24-at 2019 07:16
Nutserisoq Connie Fontain

Issittumi Sakkutooqarfik nutaamik umiarsuartaarpoq. Sakkutuut umiarsuaat Peter Willemoes aasaanerani Nunatsinniittalissaaq. Sakkutuut umiarsuaasa amerlissutaat NATO-p russit umiarsuaannut aqqartartunut  Atlantikup avannarpasissuani alapernaassasorisanut nakkutiginninnerulernerata ilagaa.

AAMMA ATUARUK Issittumi upalungaarsimanerup pitsaanerulernissaanik pisariaqartitsoqartoq danskit politikerinit paasineqalerpoq

NATO-milu ilaasortaaneq Nunatsinnut Danmarkimullu pingaaruteqartoq, Illersornissamut ilinniarfimmi sakkutuulersornermut lektori, Jon Rahbek-Clemmensen oqarpoq.

- Danmark Kalaallit Nunaallu arlaatigut iluaqutaafissaqarunik, sassarlutik peqatigisamut tapersiisarnissaat pingaaruteqarpoq, taanna oqarpoq.

USA kiffartuussinermut utertitsisartoq

Taava taamaaliorneq Kalaallit Nunaata amerikamiunit isigineqarluarneq annerulersitsisartoq, Jon Rahbek-Clemmensen oqarpoq.

- Rusland Atlantikup avannaani umiarsuarnik aqqartartunik alapernaarsuitsitsineranut nunat USA-tut ittut soqutiginniffigingaatsialerpaat, Kalaallit Nunaat peqatigissallugu USA-mut soqutiginarnerulissaaq.

Peqatigisarlu soqutiginnittoq suleqatigiinnermi amerlanerusunik iluaqutissarsisartoq, lektori isumaqarpoq.

- USA-mi kalaallinut inuiaqatigiinnut suleqatiserinnittoq qasseeriarluta ukiuni kingullerni takoreerparput, oqarluni; "apeqqummi matumani suleqatigisinnaagussi, taava allanik, Kalaallit Nunaannut naleqartumik, uagut tapersiisinnaavugut, Jon Rahbek-Clemmensen oqarpoq.

Joint Committee

Joint Committee Igalikumi isumaqatigiissut aallaavigalugu 2004-mi pilersinneqarpoq. Matumani nunatta, Danmarkip USA-llu akornanni suleqatigiinnerit assigiinngitsut ilaatigut ilinniartitaanermut, peqqinnissamut, ilisimatusarnermut kulturimullu tunngasut oqallisigineqartarput. Tamanna USA-p sakkutooqarnikkut nunatsinniititsineranut taarsiissutitut taaneqarsinnaasumik atorneqarpoq.

Taassuma suleqatiginninniarnerit mittarfinnut nutaanut tunngasut, ilinniartitaanermut peqqinnissafimmut tunngasut allallu USA-p, Danmarkip Nunattalu akornanni Joint Committeemi  2004-mili suleqatigiinnerat ilaatigut eqqaavai.

AAMMA ATUARUK Aana qulimiguulik nutaaq Seahawkimik taaguutilik

Imaani annaassiniarnissanut nakkutilliinissamullu nukissaqarnerussasoq

USA-mut ikiuinermi politikikkut iluaqutaasut saniatigut Issittumi Sakkutooqarfik sakkutuujunngitsunut tunngasunik suliaqarnermi aamma inuttassaqarnerulerpoq.

- Sakkutuut umiarsuaata maanna maaniinnerani illersornissaqarfiup sineriammi annaassiniartarneranut, mingutsitsinernik allanillu suliaqartarneranut aamma tapertaasinnaavoq.

Sakkutuut umiarsuaat Peter Willemoes aalajangersimasumik 117-inik inuttaqarpoq illersornissaqarfiullu umiarsuaani atortorissaarnerpaat ilagalugu. Umiarsuaq sakkutigut atortorissaartorujussuuvoq qulimiguulimmillu Seahawkimik aamma useqarluni.

Sakkutuut umiarsuaat Peter Willemoes videomi uani takusinnaavat.

 

WILLEMOES PÅ HAVET