Issittumi Sakkutooqarfimmi pisortataaq: Tamatsinnut iluaqutaasumik pitsaanerpaamillu
London, Bruxelles, Madrid aamma Washington.
Tassa Martin la Cour-Andersenip sakkutuutut imarsiortutut Danmarkimi aallartittup, illersornissaqarfimmi angalaffigisimasai.
- USA-mi sulinikuuvunga. Tamaanilu Kalaallit Nunaanni, Savalimmiunilu suliassat unammillernarsinnaasut, siulianiit ilisimareerpakka. Kalaallit Nunaanni Savalimmiunilu illersornissakkut qullersatut inissisimaniaraanni soorunami allarluinnaavoq, unammillernartoqarlunilu.
Taanna Nuummi Issittumi Sakkutooqarfimmi qaammat ataaseq pisortaasimalerpoq, misigisaqarfiungaatsiarsimasorlu, taanna oqarpoq
* Illersonissaqarfik nunatsinni ilaatigut imaani, nunami silaannarmilu nakkutiginnittarput.
* Tamatuma saniatigut Issittumi Sakkutooqarfik ujaasinernik annaassiniarnernillu suliaqartarput.
* Aammali avatangiisit mingutsinneqatsaaliortarpaat, aalisarnermik nakkutiginnittarput, ilisimasassarsiortullu ilaanneeriarlutik sullittarlugit.
Tusarfik: Issittumi Sakkutooqarfik
- USA-mi sulinikuuvunga. Tamaanilu Kalaallit Nunaanni, Savalimmiunilu suliassat unammillernarsinnaasut, siulianiit ilisimareerpakka.
- Kalaallit Nunaanni Savalimmiunilu illersornissakkut qullersatut inissisimaniaraanni soorunami allarluinnaavoq, unammillernartoqarlunilu, taanna oqarpoq.
Illersornissami pisortaq nutaaq, naalakkersuisullu nutaat
Taanna nunatsinnut qaammat ataaseq qaangiummat tikippoq. Tikinneratalu nalaani politikkikkut siuttut aamma taarseqqammerput.
IA-p Naleqqallu naalakkersuisoqatigiinnissamut isumaqatigiissutaat politikkip iluani maluginiagaasa ilagaat, tassalu nunanut allanut tunngasunut, - illersornissamut - sillimaniarnermullu politikki pillugu isumaqatigiissusiormata.
Isumaqatigiissummi ilaatigut partiit taakku marluk nunatsinni sakkulersortoqannginnissaanik sulissuteqarusupput. Ersarisumilli sorpiaat imarineqarnersut suli paasineqavinngilaq.
AAMMA ATUARUK Mette Frederiksen: Isumatigiissutit oqallisigeqqinnissaat nalinginnaalluinnarpoq
Martin la Cour-Andersen danskit nunatsinni illersornissaqarfiani atorfeqarpoq. Taannalu nunaginngisamini nunaminullu qanimut suleqateqarluartumi sulinini qanoq igineraa aperaarput?
- Nuna allaavoq. Tamanna eqqorpoq. Taamaakkaluartoq naalagaaffeqatigiinnermi suliassat assigiittut isigivakka. Suliassarpassuagut kisitta naammassisinnaaneq ajorpagut. Kalaallit oqartussat tassalu politiit naalakkersuisoqarfillu suleqatigilluinnarpagut.
Martin la Cour-Andersen oqarpoq nangillunilu:
- Tamanut iluaqutaasussamik ajunnginnerpaamillu suleqatigiinneruvoq. Taamaammat Kalaallit Nunaanni illersornissaqarfimmi danskisuinnaq isiginngilanga. Naalagaaffeqatigiinni illersornissaqarfiup iluani sulisutut misigineruvunga.
Martin la Cour-Andersen Issittumi Sakkutooqarfimmi pisortatut juunip ulluisa qulingani aallartippoq. Asse: Issittumi Sakkutooqarfik.
Sakkutuujusussaatitaanermut misiliineq illersornissamullu ilinniarneq naaggaarpaat
Pele Broberg (N) nunanut allanut tunngasunut naalakkersuisunngutsiareerluni Kangerlussuarmi illersornissamut ilinniarfissatut pilersaarut unitsinniarlugu pilersaalersaarpoq.
Taassumami naalakkersuisoqataasalu illersornissamut ulinniarfeqalernissaq naalakkersuisut siuliisa akuersissutigisaat, pinnagu sillimaniarnermut ilinniarfeqalernissaa orniginartinneruaat.
Taasumalu saniatigut sakkutuujusussaatitaanermut misiliinissaq ukioq manna unitsikkallarneqassasoq Naalakkersuisut kissaatigaat. Illersornissaqarfik illersornissaqarfimut misilitsikkusuttunut misilitsitsiniarluni nunatsinnnukartaraluarpoq. Ukiorli manna taamaaliornavianngillat.
AAMMA ATUARUK Naalakkersuisut sakkutuujusussaatitaanermut misilitsittarnerit unitsikkaat
Suliat taakkununnga tunnganut nunatsinni dasnkillu nutaarsiassaqartitsivianni eqqartorneqangaatsiarput, taamaakkaluartoq Martin la Cour-Andersenip nunarput Issittumilu Sakkutooqarfik suleqatigiilluartut oqaatigaa.
Naalakkersuisuusimasut maannalu naalakkersuisut isumaqatigiissutaat assigiingillat, tassalu sakkulersortoqannginnissaanik anguniagaqalerneq. Tamanna naalakkesuisoqarfimmut suleqatigiinnissinnut malunniuteqarpa?
- Qaammat ataaseq maaniinni suleqatigiilluarnerput misigivara. Suleqatigiinnitta allannguuteqarneranik malugisaqanngilanga, Martin la Cour-Andersen KNR-imut oqarpoq.
